«Ուկրաինացի օլիգարխներն ԱՄՆ ընտրություններին ֆինանսավորել են կոնկրետ «թեկնածուհու»». Պուտին
Ուկրաինայի իշխանություններն ԱՄՆ ընտրությունների ժամանակ սատարել են կոնկրետ թեկնածուի և այժմ փորձում են Դոնբասում իրավիճակի սրումն օգտագործել Սպիտակ տան նոր վարչակազմի հետ հարաբերություններ հաստատելու համար: Ինչպես փոխանցում է ՏԱՍՍ-ը, այդ մասին հայտարարել է ՌԴ նախագահ Վլադիմիր Պուտինը Բուդապեշտում իր հունգարացի գործընկերոջ հետ համատեղ ասուլիսում:
«Ինչպես գիտենք՝ ԱՄՆ-ի նախընտրական քարոզարշավի ընթացքում ուկրաինական գործող իշխանությունը գրավել է միակողմանի դիրք՝ հօգուտ թեկնածուներից մեկի, և ավելին, որոշ օլիգարխներ քաղաքական իշխանության համաձայնությամբ ֆինանսավորել են այդ թեկնածուին, կամ այդ թեկնածուհուն, եթե ավելի հստակ ասենք»,- ընդգծել է Պուտինը:
ՌԴ նախագահի խոսքով՝ այժմ Ուկրաինայի իշխանություններին անհրաժեշտ է հարաբերություններ հաստատել ԱՄՆ նոր վարչակազմի հետ և կրկին հակամարտության միջոցով: «Դա ավելի հարմար է, հեշտ է նոր վարչակազմին ներգրավել ուկրաինական խնդիրների մեջ, և դրա միջոցով ինչ որ կերպ երկխոսություն հասատել»,- ընդգծել է Պուտինը՝ մեկնաբանելով Դոնբասում իրավիճակի սրման մասին հարցը: