Ինչպե՞ս ջարդել «յառի» պետական կառավարիչների ողնաշարը, եթե արձակուրդում ես

ՀՀ վարչապետ Կարեն Կարապետյանն օրերս ԿԱ Պետգույքի կառավարման վարչության պետ Արման Սահակյանին հանձնարարել է՝ արագ ավարտին հասցնել մասնավորեցման նոր ծրագրի մշակման աշխատանքները և պատրաստել ամբողջ փաթեթը՝ շեշտելով, որ պետք է կասեցնել պետական այն կառավարիչների գործունեությունը, որոնք արդյունավետ չեն աշխատում:

«Էն յառի պետական կառավարիչները, որոնք տարեցտարի մեզ ֆռռացնում են, Արմա՛ն, էս ամսվա մեջ սաղի ողնաշարը կջարդես»,- ասել է Կ.Կարապետյանը՝ դիմելով Արման Սահակյանին։

Սակայն խնդիրն այն է, որ Արման Սահակյանը չի կարողանա վարչապետի այս հանձնարարությունը կատարել՝ պարզապես ժամանակի սղության պատճառով։ Խորհրդարանական ընտրություններին մասնակցելու կապակցությամբ՝ նա փետրվարի 1-ից արձակուրդում է լինելու և աշխատանքի վերադառնալու է միայն ապրիլի 3-ից հետո: Այս մասին հրամանագիրը ստորագրել է հենց Կարեն Կարապետյանը։

168.am-ը Ա.Սահակյանից հետաքրքրվեց, թե ինչպե՞ս է հասցնելու կատարել վարչապետի հանձնարարականը, եթե արձակուրդ է վերցնում։

«Բնական է, որ արձակուրդ եմ գնում, բայց Պետական գույքի կառավարման վարչությունում միայն ես չեմ աշխատում։ Ինձ փոխարինելու է իմ տեղակալը՝ Աշոտ Մարկոսյանը։ Դա անձնապես ինձ չի տրված, դա կոնկրետ գերատեսչությանն է այդ հանձնարարականը տրված։ Իսկ մենք վերջին տարիներին ապացուցել ենք, որ ամեն ինչ հասցնում ենք ժամանակին»,- ասաց Սահակյանը։

Մեկնաբանելով Կ.Կարապետյանի «յառի պետական կառավարիչների ողնաշարը ջարդելու» հանձնարարականը՝ Ա.Սահակյանը վստահեցրեց. «Հանձնարարությունը մենք ամբողջովին հասկացել ենք, ընթացքին դուք ինքներդ ականատես կլինեք»։

Տեսանյութեր

Լրահոս