Քաղաքական գործիչները կոչ են անում Մեքսիկայի նախագահին Թրամփի պատճառով չեղարկել ԱՄՆ այցը
Մեքսիկայում քաղաքական գործիչները պահանջել են, որպեսզի նախագահ Էնրիկե Պենյա Նյետոն չեղարկի ԱՄՆ այցն այն բանից հետո, երբ նախագահ Դոնալդ Թրամփը հրամանագիր է ստորագրել երկու երկրների միջև պատի կառուցման շինարարությունն սկսելու մասին, հայտնում է The Guardian-ը։
«Ամերիկացիները Մեքսիկայի դեմքին շրխկացրեցին դուռը։ Լավագույնը, որ կարող ենք անել այդ հանգամանքներում, չստորանալն է, չեղարկել ԱՄՆ այցը և Մեքսիկայի համար մշակել արժանապատիվ դիրքորոշում»,- հայտարարել է նախագահի նախկին թեկնածու Կուաուտեմոկ Կարդենասը։
Մեքսիկայի նախկին արտգործնախարար Խորխե Կաստանեդան Թրամփի որոշումն անվանել է վիրավորական Մեքսիկայի նախագահի, իշխանությունների և ողջ ժողովրդի համար։
Associated Press-ի տեղեկություններով՝ Մեքսիկայի նախագահը մտածում է ԱՄՆ այցը չեղարկելու մասին։
Նյետոն պետք է Վաշինգտոն մեկնի հունվարի 31-ին։ Ավելի վաղ նա հայտարարել էր, որ Մեքսիկան չի վճարելու պատի շինարարության մասին, թեև այդ մասին հայտարարում են ԱՄՆ նոր իշխանությունները։
Հունվարի 25-ին Թրամփը հրամանագիր է ստորագրել, որը նախատեսում է պատ կառուցել Մեքսիկայի հետ սահմանին։
