Բաժիններ՝

Global Game Jam 2017. Հայաստանում ստեղծվել է 6 նոր խաղ

Հայաստանում առաջին անգամ անցկացվեց  Global Game Jam խաղերի միջազգային հեքեթոնը։

Global Game Jam  խաղային հեքեթոնը տևում է 48 ժամ։ Հայաստանում այն անցկացվեց հունվարի 20-22-ը:  Խաղ ստեղծելու համար մասնակիցները բերում են իրենց անհրաժեշտ ամեն ինչ (համակարգիչ, մոնիտոր և այլ տեխնիկա, գրենական պիտույքներ, սնունդ և այլն)։ Տեղում հայտարարվում է ստեղծվելիք խաղի այդ տարվա թեման, որը որոշվում է GGJ-ի կողմից։ Այս տարի խաղերի թեման ալիքներն էին: Ստեղծած խաղերը կապված էին ձայնային, լուսային, ծովային ալիքների և նույնիսկ ձգողականության ուժի հետ, որով մասնակիցները ցույց են տվել իրենց ստեղծագործ միտքն ու ստեղծել հետաքրքիր խաղեր:

Հեքեթոնին Հայաստանում մասնակցում էին  30 մասնակիցներ: Վերջիններս կազմել էին թվով 5 թիմեր, որոնց թվում էին՝  ծրագրավորողներ, նկարիչներ, անիմատորներ, սցենարիստներ, ձայնային ձևավորողներ և այլք։  Մասնակիցներին տրված էր ստեղծագործական ազատություն. նրանք կարող էին ստեղծել թե՛ վիդեո խաղեր,  թե՛ սեղանի խաղեր (board game):

Հայաստանում այս միջոցառման կազմակերպիչներն էին Noor Games-ը, Ինֆորմացիոն տեխնոլոգիաների ձեռնարկությունների միությունը  և  Հայաստանի Ամերիկյան համալսարանի (ՀԱՀ) Ձեռներեցության և նորարարական տեխնոլոգիաների կենտրոնը:

Կարդացեք նաև

«Սա հիանալի հնարավորություն է խաղերի սիրահարների համար, ովքեր երազել են ստեղծագործել, գրել սեփական խաղը։ Վստահ ենք, որ միջոցառումը կնպաստի ոլորտում էնտուզիաստների, մասնագետների և ընկերությունների միջև շփման ակտիվացմանը և նոր ծանոթությունների ու կապերի ձևավորմանը»,- նշում են միջոցառման կազմակերպիչները:

Միջոցառման կազմակերպիչները նշում են նաև, որ հեքեթոնը  կմեծացնի հետաքրքրությունը ծրագրավորման և հատկապես խաղերի ստեղծման նկատմամբ, ի հայտ կբերի նոր և կրեատիվ գաղափարներ:

Կազմակերպիչները շեշտում են հատկապես այն հանգամանքը, որ միջոցառումը չունի հաղթողներ կամ պարտվողներ: Գլխավոր նպատակը նոր խաղեր ստեղծելն է:

Հունվարի 20-22-ն անցկացված հեքեթոնի ընթացքում ստեղծվել են 6 խաղեր՝

  • Psychedelic Waves
  • Star catchers
  • Noizes
  • Reach 2 Sea
  • The Fault in Our Waves
  • Breaktrough wave

Տեղեկացնենք նաև, որ Global Game Jam հեքեթոնը կազմակերպվում է 2009 թվականից:  2017 թվականին հեքեթոնին մասնակցելու է 98 երկիր, այդ թվում՝ նաև Հայաստանը։

Սիրարփի Աղաբաբյան

Բաժիններ՝

Տեսանյութեր

Լրահոս