Պատմական այց. Ճապոնիայի վարչապետն առաջին անգամ այցելել է Փերլ-Հարբոր
ԱՄՆ նախագահ Բարաք Օբաման Ճապոնիայի վարչապետ Սինձո Աբեի այցը Փերլ-Հարբոր անվանել է «պատմական արարք», որը ցուցաբերում է հաշտեցման ուժը, հայտնում է Associated Press-ը։
Աբեն առաջին անգամ է ժամանել Փերլ-Հարբոր։ Օբամայի հետ նա հարգել է ամերիկացի զինվորների հիշատակը, որոնք զոհվել են Երկրորդ համաշխարհային պատերազմի ժամանակ։
Օբամայի խոսքով՝ Աբեի ներկայությունը Փերլ-Հարբորում հիշեցումն է նրա, թե ինչ կարող է տեղի ունենալ ազգերի և մարդկանց միջև։ Նրա խոսքով՝ դա ցուցադրում է, որ պատերազմներն ավարտվում են, և վաղեմի թշնամիները դառնում են ընկերներ։
«Խաղաղության պտուղները գերազանցում են պատերազմի դափնիները»,- ասել է Օբաման՝ ընդգծելով, որ երկու երկրների հարաբերությունները դեռ երբեք չեն եղել այդքան ամուր։
