Սպանությունը զուգորդվել է բռնաբարությամբ. 23-ամյա երիտասարդը մեղադրվում է հեռավոր ազգականուհուն բռնաբարելու, սպանելու մեջ
2016թ. մայիսի 9-ի լույս 10-ի գիշերը գյուղերից մեկում 1960թ. ծնված կնոջ սպանության գործով նախաքննությունն ավարտվել է, քրեական գործն ուղարկվել է դատարան։
Քրեական գործով մեղադրանք է առաջադրվել 23-ամյա երիտասարդի, ով կնոջ հեռավոր ազգականն է։ Նրան մեղադրանք է առաջադրվել այն բանի համար, որ նա 2016 թվականի մայիսի 10-ին, ժամը 02-ի սահմաններում, ոգելից խմիչք օգտագործած վիճակում սպանել է կնոջը, ինչը զուգորդվել է վերջինիս բռնաբարությամբ:
ՀՀ քննչական կոմիտեն դեպքի կապակցությամբ հայտնել էր, որ ձեռնարկված քննչական գործողությունների արդյունքում պարզվել է, որ դեպքի օրը կնոջն է այցելել նրա հեռավոր ազգականը (ծնված 1993թ.)՝ հարբած։ Նախնական տվյալներով՝ երիտասարդը կնոջն առաջարկել է սեռական հարաբերություն ունենալ, սակայն մերժում ստանալով՝ բռնություն է գործադրել նրա նկատմամբ և սպանել։ Ձեռք բերված ապացույցների համաձայն՝ երիտասարդը կպչուն ժապավենով փակել է կնոջ բերանը, կապել ձեռքերը և սրբիչի գործադրմամբ փակելով շնչառական ուղիները՝ խեղդել։
Կնոջ մահից հետո առանձնատան երկու սենյակների անկողիններն այրելու միջոցով փորձ է արվել հրկիզել տունը, սակայն մեղադրյալի կամքից անկախ հանգամանքներով, հանցագործությունն ավարտին չի հասցվել. տուժածի դիակն ու անկողիններն ամբողջությամբ չեն այրվել։
