Մոսկվայում շտապ հոսպիտալացրել են Յուրի Լուժկովին. ԶԼՄ-ներ
Մոսկվայի նախկին քաղաքապետ Յուրի Լուժկովն այսօր շտապ հոսպիտալացվել է Մոսկվայի կլինիկաներից մեկը։ Բժիշկները նրան տեղափոխել են վերակենդանացման բաժանմունք և ներկայումս պայքարում են նրա կյանքի համար, հայտնում է Interfax-ը՝ հղում կատարելով բժշկական շրջանակներում աղբյուրին։
«Յուրի Միխայլովիչը իսկապես հոսպիտալացվել է մոսկովյան կլինիկաներից մեկը։ Նա գտնվում է վերակենդանացման բաժանմունքներից մեկում»,- ասել է գործակալության զրուցակիցը։
Լուժկովի մամուլի քարտուղարը ավելի վաղ հերքել էր Մոսկվայի նախկին քաղաքապետի հոսպիտալացման մասին լուրերը։
Լուժկովը ղեկավարել է Մոսկվան ավելի քան 18 տարի։ Նա 5 անգամ զբաղեցրել է քաղաքապետի պաշտոնը։
2010թ. ՌԴ նախագահ Դմիտրի Մեդվեդևը իր հրամանագրով նրան ազատեց Մոսկվայի քաղաքապետի պաշտոնից։
