Ռուսաստանը ռազմական ոստիկանության ջոկատներ է մտցրել Հալեպ
Սիրիայի Հալեպ քաղաքի ազատագրված շրջաններ են մտցվել ռուսական ռազմական ոստիկանության ջոկատներ, հայտնում է Interfax-ը՝ վկայակոչելով Ռուսաստանի պաշտպանության նախարար Սերգեյ Շոյգուին։
«Ազատագրված տարածքներում կարգը պահպանելու համար երեկ երեկոյան այնտեղ մտցվել են ռազմական ոստիկանության ջոկատներ»,- հայտարարել է ռուս նախարարը ՌԴ նախագահ Վլադիմիր Պուտինի հետ հանդիպմանը։
Շոյգուն հայտարարել է, որ Հալեպում զինյալների դուրսբերման գործընթացն ավարտվել է: Նրա խոսքով՝ պայմաններ են ստեղծվել Սիրիայում կրակի լիարժեք դադարեցման բանակցություններ սկսելու համար։
