Արցախի բռնցքամարտի առաջնությունն առանձնացել է մարզիկների քանակով և ակտիվ մասնակցությամբ
Արցախի բռնցքամարտի Ֆեդերացիայի նախաձեռնությամբ Ստեփանակերտում նոյեմբերի 27-ին կայացել է Արցախի բռնցքամարտի առաջնությունը: Ստեփանակերտի մանկապատանեկան մարզադպրոցի բռնցքամարտի մարզիչ Գևորգ Թորոսյանն ասել է, որ Արցախում առաջին անգամ կազմակերպվող բռնցքամարտի առաջնությունն առանձնանում է մարզիկների քանակով և ակտիվ մասնակցությամբ:
Գ. Թորոսյանի խոսքով՝ բռնցքամարտի առաջնությանը մասնակցել է Քաշաթաղի, Մարտակերտի և Ստեփանակերտի 7-19 և 19-ից բարձր տարիքային խմբերի շուրջ 80 մարզիկ: «Առաջնության նպատակը մարզիկների մարզական վիճակի և վարպետության կատարելագործումն է: Միայն մարզիչներիս ջանքերով դժվար է մարզական աշխարհում լուրջ հաջողությունների հասնել, հետևաբար, պետք է նաև մարզիկները լինեն աշխատասեր, կոփված, առողջ և նպատակասլաց: Ես գոհ եմ առաջնությանը մասնակցած մարզիկների պատրաստվածության աստիճանից»,ասել է Գ. Թորոսյանը և նշել, որ նման առաջնություններ Արցախում պետք է հաճախակի կազմակերպել:
Բռնցքամարտի մարզչի կարծիքով՝ սպորտի բնագավառում առաջացած խնդիրները միմիայն համակարգված աշխատանքի շնորհիվ է հնարավոր լուծել:
Առաջնությունում մրցանակային տեղեր գրաված մարզիկներն արժանացել են մեդալների, դիպլոմների, իսկ առաջին տեղ գրավածները՝ նաև գավաթների:
