«ԼՂ հակամարտությունը պետք է լուծվի խաղաղ ճանապարհով». Բրիջիթ Բրինք
Լեռնային Ղարաբաղի հակամարտությունը պետք է լուծվի խաղաղ ճանապարհով, երեկ Բաքվում լրագրողների հետ հանդիպմանը հայտարարել է ԱՄՆ պետքարտուղարի Եվրոպայի և Եվրասիայի հարցերով փոխտեղակալ Բրիջիթ Բրինքը։ Այս մասին հայտնում է Trend-ը։
«Հակամարտության լուծման ռազմական ուղի չկա։ ԱՄՆ-ը հանձնառու է աշխատել հակամարտության կողմերի հետ՝ գտնելու լուծման ուղիներ»,- հայտարարել է նա։
Անդրադառնալով ԵԱՀԿ Մինսկի խմբի ամերիկացի համանախագահ Ջեյմս Ուորլիքի՝ համանախագահի պաշտոնից հեռանալուն, Բրինքը նշել է, թե ԱՄՆ-ն ողջունում է Ուորլիքի աշխատանքը՝ որպես համանախագահ։
«Դեռ հայտնի չէ, թե ով կդառնա ԱՄՆ-ից հաջորդ համանախագահը»,- նշել է նա։
