Մխիթարյանը և Ղազարյանը՝ հավաքականի հաղթանակի մասին
Վազգեն Սարգսյանի անվան Հանրապետական մարզադաշտում ավարտին է մոտեցել Հայաստան-Չեռնոգորիա հանդիպումը: Հանդիպումը անցավ դրամատիկ պայքարում և 0:2 հաշվով պարտվելուց հետո Հայաստանի հավաքականը կարողացավ հաղթանակ տանել 3:2 հաշվով:
Խաղի ավարտից հետո ֆուտբոլիստները կիսվել են իրենց կարծիքներով:
Հենրիխ Մխիթարյանը, ով երկար դադարից հետո վերջապես ամբողջական հանդիպում անցկացրեց, նշեց, որ մի փոքր ֆիզիկապես բարդ էր խաղալը, բայց կար խաղալու մեծ ցանկություն:
«3 տարի պաշտոնական հանդիպում չէինք ունեցել և շատ ուրախ ենք: Հանդերձարանը ցնծում էր: Ֆանտաստիկ հանդիպում էր: Ոչ ոք չէր սպասում, որ մենք կհաղթենք, բայց մենք ուժ գտանք մեր մեջ: Երկրորդ խաղակեսում մենք ուղղեցինք սխալները, ինքներդ տեսաք և կարծում եմ կգնահատեք»:
Խաղի հերոսներից մեկը՝ Գևորգ Ղազարյանը, ով վերջին վայրկյանին խփեց հավաքականի հաղթական գոլը նշում է, որ չի ցանկանում առանձնացնել ոչ ոքի, քանի որ հաղթանակը հնարավոր դարձավ բոլոր տղաների ջանքերի և նվիրվածության շնորհիվ:
Տղաները խոսեցին նաև նորանշանակ մարզիչ Արթուր Պետրոսյանի մասին: Հենրիխի խոսքով՝ Արթուր Պետրոսյանը 4-5 օրում կարողացավ մեծ աշխատանք կատարել, ինչի ադյունքը ակնհայտ էր: Ղազարյանն էլ շեշտեց, որ Պետրոսյանը առաջինը թիմ բերեց լավ տրամադրություն և ստիպեց բոլորին հավատալ իրենց ուժերին:
Պետք է նշել, որ հանդերձարանից դուրս գալուց հետո հայ ֆուտբոլիստները խոսում էին խզված ձայնով, ինչը ևս մեկ անգամ ապացուցում է Հենրիխի խոսքերը՝ հանդերձարանը ցնծում էր:
Սիրարփի Աղաբաբյան
