Տարեցտարի ստուգումները բացահայտում են ավելի քիչ խախտումներ. Արա Նռանյան
ՀՀ վերահսկիչ պալատը հաջորդ տարի վերահսկողություն կիրականացնի 20-ից ավելի ուղղություններով: Այս մասին այսօր ԱԺ ֆինանսանավարկային և բյուջետային հարցերի մշտական հանձնաժողովի նիստում ՀՀ վերահսկիչ պալատի 2017 թ-ի գործունեության տարեկան ծրագրի քննարկման ժամանակ տեղեկացրեց ՎՊ անդամ Արա Նռանյանը:
Ըստ նրա` վերահսկողության ուղղություններն ընտրելիս հաշվի են առնվել նոր ծրագրերի իրականացումը, հանրության, ԶԼՄ-ների, քաղաքական գործիչների բարձրաձայնումները և այլն: Ա.Նռանյանի խոսքով` նաև սոցիալական կարևոր ոլորտներ են ներառվել, որոնք մեծ քանակությամբ շահառուներ ունեն:
«Տարեցտարի ստուգումները բացահայտում են ավելի քիչ խախտումներ, որը պայմանավորված է նաև նրանով, որ գիտեն, որ ստուգումներ են իրականացվում»,- ասաց Ա.Նռանյանը:
Նա նշեց, որ ՎՊ-ի ռեսուրսները հաջորդ տարի ավելի սահմանափակ կլինեն, քանի որ ԵՄ կողմից 10 մլն եվրո ֆինանսավորման շրջանակներում պալատի աշխատակազմի վերապատրաստման և ուսուցման ծրագրեր են իրականացվում:
