Թրամփի պաշտոնական կայքից անհետացել է մուսուլմանների մուտքն ԱՄՆ արգելող կետը
ԱՄՆ նորընտիր նախագահ Դոնալդ Թրամփի մի քանի սկանդալային հայտարարություններ անհետացել են նրա պաշտոնական կայքից։ Խոսքը մասնավորապես Կալիֆոռնիայի Սան-Բեռնարդինո քաղաքի հրաձգությունից հետո Ամերիկա մուսուլմանների մուտքն արգելող առաջարկի և Կլիմայի հարցով փարիզյան համաձայնագիրը չեղյալ հայտարարելու մտադրության մասին է։
Թրամփի նախընտրական շտաբի ներկայացուցիչները հրաժարվել են մեկնաբանել կայքում տեղ գտած փոփոխությունները, հայտնում է BBC-ն։
Նախօրեին ԱՄՆ Կոնգրեսի հանրապետական խոսնակ Փոլ Ռայանի հետ հանդիպումից հետո Թրամփը պատմել է, թե ինչով կզբաղվի առաջին հերթին նախագահի պաշտոնն զբաղեցնելուց հետո։
Նա խոստացել է նվազեցնել հարկերը, չեղարկել Բարաք Օբամայի առողջապահական բարեփոխումը, ինչպես նաև զբաղվել միգրացիայի խնդիրներով։
«Կարծում եմ՝ հիանալի բաներ կանենք ամերիկացիների համար»,- ասել է Թրամփը։
