«Քրդամետ HDP կուսակցությունը ֆինանսավորել է ահաբեկիչներին». Թուրքիայի վարչապետ
Քրդամետ Ժողովուրդների դեմոկրատական կուսակցությունը (HDP) օգտագործել է պետական միջոցները ահաբեկչությունը ֆինանսավորելու համար, հայտարարել է Թուրքիայի վարչապետ Բինալի Յըլդըրըմը: Այս մասին հայտնում է Reuters-ը:
«Տարիներ շարունակ մենք ձեզ կոչ ենք արել ասել, որ դեմ եք ահաբեկչությանն ու ահաբեկչական կազմակերպություններին: Դուք չէիք լսում: Նրանք քաղաքապետարանների համար նախատեսված գումարները տարիներով ուղղում էին ահաբեկչությանը»,- հայտարարել է Յըլդըրըմը՝ խոսելով HDP-ի ներկայացուցիչների մասին:
Նրա խոսքով՝ նա, ով վնաս է հասցնում ազգին, դրա համար կվճարի: «Եվ խոսքը ոչ միայն նրանց մասին է, որոնք իրականացնում են պայթյուններ, այլև նրանց, ովքեր աջակցում են ահաբեկչությանը»,- նշել է նա:
Երեկ Թուրքիայի քրդամետ Ժողովուրդների դեմոկրատական կուսակցության (HDP) պատգամավորների ձերբակալությունից և կալանավորումներից, ինչպես նաև Դիարբեքիր քաղաքի ահաբեկչությունից հետո խմբակցության անդամները կասեցրել են իրենց մասնակցությունը Թուրքիայի խորհրդարանի աշխատանքներին:
Թուրքական դատախազությունը ձերբակալել է HDP-ի 12 պատգամավորի, ինչպես նաև կուսակցության մի շարք այլ անդամների:
