Ղարաբաղի ՄԻՊ-ը ադրբեջանական ագրեսիայի վերաբերյալ նոր զեկույց կհրապարակի
Ապրիլյան քառօրյա պատերազմից հետո Մարդու իրավունքների պաշտպանի գրասենյակը ադրբեջանցիների կողմից հայկական կողմի զինվորներին խոշտանգելու վերաբերյալ նոր փաստեր է հավաքել և ներկայացրել միջազգային կառույցներ։
Թե կոնկրետ ի՞նչ աշխատանքներ են կատարվել՝ «Արմենպրես»-ը հետաքրքրվել է ԼՂՀ մարդու իրավունքների պաշտպան Ռուբեն Մելիքյանից։
Փորձեցինք տեղեկություններ իմանալ նաև, թե ի՞նչ արձագանքներ են եղել միջազգային կառույցների կողմից այդ փաստերի վերաբերյալ։
«Ապրիլյան քառօրյա պատերազմից հետո Ադրբեջանի ոճրագործությունների, խաղաղ բնակիչների և զոհված զինվորների մարմինների խեղումների կապակցությամբ ԼՂՀ մարդու իրավունքների պաշտպանի ներկայացրած փաստերի վերաբերյալ միջազգային կառույցների կողմից ոչ մի ֆորմալ արձագանք չի եղել։ Նշեմ, որ ադրբեջանական զինված ուժերի կողմից Արցախի խաղաղ բնակչության և պաշտպանության բանակի զինվորների նկատմամբ 2016 թ. ապրիլի 2-5-ն ընկած ժամանակահատվածում կատարված դաժանությունների մասին ԼՂՀ օմբուդսմենի միջանկյալ զեկույցը հրապարակվել է «Մարդու իրավունքն երի միջազգային ֆեդերացիայի (FidH)» և «Օմբուդսմենի եվրոպական ինստիտուտի (EOI)» պաշտոնական կայքէջերում»,- ասաց Ռուբեն Մելիքյանը։
ԼՂՀ ՄԻՊ-ի խոսքով՝ ադրբեջանական ագրեսիայի, վայրագությունների մասին առաջիկայում ԼՂՀ օմբուդսմենի կողմից կհրապարակվի նոր զեկույց և կներկայացվի միջազգային կառույցներին:
Լիլիթ Դեմուրյան
