Ֆինանսների փոխնախարարը պարզաբանում է, թե ինչու են Սերբիայի հետ կրկնակի հարկման համաձայնագիր կնքում
Այսօր Ազգային ժողովի հերթական նիստում քննարկվում է 2014 թվականի մարտի 10-ին Երևանում ստորագրված «Հայաստանի Հանրապետության կառավարության և Սերբիայի Հանրապետության կառավարության միջև եկամուտների և գույքի կրկնակի հարկումը բացառելու մասին» կոնվենցիան վավերացնելու մասին հարցը։
Նախագծի հիմնական զեկուցող, ՀՀ ֆինանսների նախարարի տեղակալ Արմեն Հայրապետյանը հայտարարեց, որ հիշյալ համաձայնագիրն ապահովում է հարկերից խուսափելը կանխելու մեխանիզմներ, ինչպս նաև երաշխավորում է պայմանավորվող պետությունների ազգային անձանց նկատմամբ հարկային խտրականության բացառում՝ համաձայնագրում ներառված հարկերի առնչությամբ. «Կոնվենցիայի կնքումը հնարավորություն կտա զարգացնելու երկու պետությունների միջև ապրանքների և ծառայությունների շրջանառության ավելացումը, կապիտալի, տեխնոլոգիայի, մարդկանց շարժը, կնպաստի տնտեսական կապերի զարգացմանը»։
ԲՀԿ-ական պատգամավոր Միքայել Մելքումյանը հետաքրքրվեց, թե ինչպիսի՞ն է Հայաստան-Սերբիա առևտրաշրջանառությունը. «Մի քիչ վիճակագրությունը ներկայացրեք, Սերբիայից Հայաստան կամ Հայաստանից Սերբիա ի՞նչ գործունեություն կա, ի՞նչ ներդրումներ են կատարվում, ունե՞նք համատեղ ձեռնարկություններ, որպեսզի հասկանանք՝ այս համաձայնագիրը պրոֆիլակտիկ բնո՞ւյթ է կրում, թե՞ կոնկրետ ակտիվացում կա, ու դրանից ելնելով՝ ուզում ենք այդ խնդիրը լուծել»։
Փոխնախարարը նշեց, որ 2015 թվականին Սերբիայի և Հայաստանի միջև առևտրաշրջանառությունը շատ փոքր է եղել՝ 2.8 միլիոն դոլար, որը մեր ընդհանուր առևտրաշրջանառության մեջ կազմում է 0.06 տոկոս. «Առևտրային հաշվեկշիռը բացասական է, մենք նրանցից ավելի շատ ներմուծում ենք, քան արտահանում ենք, բայց մեր արտահանման տեմպը դեպի Սերբիա 2015-ին ավելացել է 5.5 տոկոսով։ Թե ինչո՞ւ ենք գնում սրան, խնդիրն այն է, որ երկիրը փորձում է տնտեսական կապերը զարգացնել բոլոր հնարավոր գործընկերների հետ, եթե անգամ կան խնդիրներ հիմնական գործընկերների հետ, չենք բացառում հարաբերություններն այլ գործընկերների հետ։ 2016 թվականի հոկտեմբերի 1-ի դրությամբ մենք արդեն 41 երկրի հետ ունենք կրկնակի հարկման համաձայնագրեր։ Հիմնական թիրախը եղել է եվրոպական երկրների հետ կնքելը, միայն Պորտուգալիայի հետ դեռ չենք բանակցել, մյուս բոլոր եվրոպական երկրների հետ բանակցել ենք»։
