Մոսուլի ազատագրումը շարունակվում է․ «Փեշմեգայի» ջոկատները 7 բնակավայր են ազատագրել ԴԱԻՇ-ից
Քրդական «Փեշմեգայի» ջոկատները վերահսկողություն են սահմանել Իրաքի Մոսուլ քաղաքի մերձակայքում գտնվող 7 բնակավայրերի նկատմամբ, հայտնում է Al Jazeera հեռուստաալիքը։
Քրդական Firat գործակալության տեղեկություններով՝ քրդական զորամիավորումներին աջակցություն է ցուցաբերում միջազգային կոալիցիայի ավիացիան։
Մարտիկները Մոսուլ են շարժվում Խազր բնակավայրից՝ երեք ուղղությամբ։ Այս փուլում ռազմական գործողությանը մասնակցում է մոտ 4000 քուրդ զինյալ, իսլամիստների հետ տեղի են ունենում բախումներ։
Որոշ տեղեկությունների համաձայն՝ Մոսուլի ազատագրման գործողությանը կմասնակցի 15-18 հազար քուրդ զինյալ։
Մոսուլի ազատագրման գործողությունը սկսվել է հոկտեմբերի 17-ին։ Բացի Իրաքի կառավարական ուժերից, դրան մասնակցում են նաև քրդական զորամիավորումներ, ինչպես նաև միջազգային կոալիցիան։
