«Մեր պայքարը Վրաստանում շարունակվում է, մենք ոչ մի տեղ չենք պատրաստվում հեռանալ». ընդդիմադիր «Միացյալ ազգային շարժում»
Մեր պայքարը շարունակվում է, մենք ոչ մի տեղ չենք պատրաստվում հեռանալ։ Այս մասին, ինչպես հայտնում է «Գրուզիա օնլայնը», երեկ կայացած մամուլի ասուլիսի ժամանակ հայտարարել է ընդդիմադիր «Միացյալ ազգային շարժում» կուսակցության առաջնորդ Դավիթ Բաքրաձեն։
Նրա խոսքով՝ այն իրավիճակում, երբ որոշ կուսակցությունների ներկայացուցիչներ հայտարարել են քաղաքականությունից հեռանալու մասին, «Միացյալ ազգային շարժումը» ձևավորվում է որպես միակ ընդդիմադիր ուժ։
«Ստեղծված իրավիճակը ստեղծում է իրականություն, երբ «Ազգային շարժումը» արդեն ոչ թե գլխավոր ուժ է հանդիսանում, այլ ձևավորվում է որպես միակ ուժ։ Այդ իսկ պատճառով մեր պայքարը շարունակվում է, մենք ոչ մի տեղ չենք պատրաստվում հեռանալ և անպայման կհաղթենք այդ պայքարում»,- հայտարարել է Բաքրաձեն։
Նրա խոսքով, թե ինչպիսին կլինեն իրենց պայքարի ձևերը, հասարակությունը կտեղեկանա մի քանի օրից։
Հիշեցնենք, որ Վրաստանի ԿԸՀ-ը հայտարարել է, որ երկրի խորհրդարան է անցնում 3 կուսակցություն՝ իշխող «Վրացական երազանք» կուսակցությունը՝ ձայների 48.65 տոկոսով, «Միացյալ ազգային շարժումը»՝ ձայների 27.12 տոկոսով։
Խորհրդարան մուտք գործելու 5 տոկոսանոց արգելքը հաղթահարել է նաև «Վրաստանի հայրենասերների դաշինք» կուսակցությունը։
