Ադրբեջանը կարող է վերսկսել հեղուկ բնական գազի արտահանումը Բաթումի նավահանգստով
Ադրբեջանը կարող է վերսկսել հեղուկ բնական գազի արտահանումը Բաթումի նավահանգստով, հայտնում է «Գրուզիա օնլայնը»՝ վկայակոչելով Ղազախստանի էներգետիկայի նախարարությանը։
Այդ հարցը քննարկվել է տնտեսական համագործակցության հարցերով ղազախա-ադրբեջանական միջկառավարական հանձնաժողովի 13-րդ նիստի ժամանակ, որն անցկացվել է սեպտեմբերի 22-ին Աստանայում։
Նիստի աշխատանքներին մասնակցել են Ադրբեջանի էներգետիկայի նախարար Նատիգ Ալիևը և Ղազախստանի էներգետիկայի նախարար Կանատ Բոզումբաևը։ Բաթումի նավթային տերմինալը պատկանում է ղազախական «ՂազՏրանսՕյլ» ընկերությանը։
Հաղորդագրության մեջ նշվում է, որ Բաթումի նավթային տերմինալում ադրբեջանական հեղուկ գազի վերամշակումը աստիճանաբար նվազել է 2010 թվականից (2010 թվականի 156.000 տոննայից մինչև 2014 թվականի 23.000 տոննայի)։
2015 թվականին Բաթումի նավահանգստով ադրբեջանական հեղուկ գազի արտահանումն ամբողջությամբ դադարեցվել է։
