Ադրբեջանն ԱՀԿ-ից 1 միլիարդ դոլարի վարկ է խնդրել
Ադրբեջանական Report կայքի հաղորդմամբ` Ադրբեջանի փոխարտգործնախարար Մահմուդ Մամեդգուլիևը հայատարարել է, թե Ադրբեջանն առաջարկել է Առևտրի համաշխարհային կազմակերպությանը (ԱՀԿ) երկրում գյուղատնտեսության աջակցության նպատակով հատկացնել 1 միլիարդ դոլարի վարկ:
Վերջինս այս մասին հայտարարել է` մեկնաբանելով համաշխարհային կազմակերպությանն Ադրբեջանի անդամակցության շուրջ հուլիսին Ժնևում կայացած բանակցությունների հերթական փուլը:
Նրա խոսքով` Ժնևում աշխատանքային խմբի նիստում քննարկվել է Ադրբեջանի արտաքին առևտրի ռեժիմը:
«Այնտեղ արդեն այդ հարցի վերաբերյալ փաստաթղթերի նախապատրաստական աշխատանք է ընթանում, թե ինչպես պետք է ստանձնենք պարտավորությունները: Նիստն անցել է բավական ակտիվ, եղել են բազմաթիվ հարցեր և´ ԱՄՆ-ի, և´ ԵՄ-ի ու այլ երկրների կողմից: Դեռ սպասում ենք, թե երբ կգան նրանց հարցերը` գրավոր տեսքով»,- հայտարարել է Մամեդգուլիևը:
Նրա խոսքով` ամենայն հավանականությամբ, բանակցությունները կանցկացվեն 2017 թվականի առաջին կեսից ոչ շուտ:
