Վրաստանում ԱՄՆ-ի հետ համատեղ կանցկացվեն Jackal Stone 2016 զորավարժությունները
Այս տարվա օգոստոսին Վրաստանում կանցկացվեն հատուկ նշանակության ուժերի Jackal Stone 2016 համատեղ վրաց-ամերիկյան զորավարժություններ, հայտնում է TASS-ը:
Ինչպես հայտնել են Վրաստանի պաշտպանության նախարարությունից, Թբիլիսիում կայացել է Վրաստանի ԶՈւ գլխավոր շտաբի պետ Վախթանգ Քափանաձեի և պաշտպանության նախարարի տեղակալ Բեսիկա Լոլաձեի հանդիպումը Վրաստան այցելած ԱՄՆ Եվրոպական հրամանատարության պատվիրակության անդամների հետ:
Պատվիրակության այցը տեղի է ունենում Jackal Stone 2016 զորավարժությունների նախապատրաստության շրջանակում:
«ԱՄՆ Եվրոպական հրամանատարության ներկայացուցիչները կուսումնասիրեն՝ որքանով ճիշտ և ժամանակին է ընթանում կայանալիք զորավարժությունների նախապատրաստությունը: Jackal Stone 2016-ը լավ թեսթ կդառնա, թե որքան արդյունավետ է ճգնաժամերի կառավարման մեր համակարգն ու ինչն է հարկավոր բարելավել այդ համակարգում»,- լրագրողներին ասել է Քափանաձեն:
Jackal Stone 2016-ը կանցկացվի ԱՄՆ բանակի հատուկ նշանակության ուժերի հրամանատարության և Եվրոպական հրամանատարության մոտ 500 զինծառայողի մասնակցությամբ:
Վրացական կողﬕց վարժանքներին կներգրավվի ՆԳ նախարարության և անվտանգության ծառայության 130 ներկայացուցիչ:
