ԱՄՆ-ն աջակցում է Ղարաբաղի հարցով ձեռք բերված պայմանավորվածություններին. ԱՄՆ Պետդեպ
ԱՄՆ-ն աջակցություն է ցուցաբերում պայմանավորվածություններին, որոնք ձեռք են բերվել Հայաստանի և Ադրբեջանի նախագահներ Սերժ Սարգսյանի և Իլհամ Ալիևի՝ Վիեննայում և Սանկտ Պետերբուրգում կայացած հանդիպումների ժամանակ և անում է ամեն հնարավորը՝ խնդրի լուծման նպատակով:
Այս մասին երեկ Երևանում հայտարարել է Ամերիկայի Միացյալ Նահանգների պետքարտուղարի Եվրոպայի և Եվրասիայի հարցերով փոխտեղակալ Բրիջիթ Բրինքը, հայտնում է RIA Novosti-ն:
«Մենք փորձում ենք նպաստել Լեռնային Ղարաբաղի հակամարտության լուծմանը, անում ենք ամենը, ինչ հնարավոր է, ԵԱՀԿ Մինսկի խմբի համանախագահների և Պետդեպարտամենտի աջակցությամբ»,- հայտարարել է Բրինքը:
Նրա խոսքով՝ Վաշինգտոնն առաջարկում է կողմերին առաջ շարժվել Վիեննայում և Սանկտ Պետերբուրգում ձեռք բերված պայմանավորվածությունների շրջանակում:
«Մենք ամբողջությամբ աջակցում ենք Վիեննայի և Սանկտ Պետերբուրգի պայմանավորվածությունների շրջանակում առաջընթացին, աջակցում ենք առաջընթացը՝ հանուն վստահության ամրապնդման և համընդգրկուն լուծման»,- հավելել է Բրինքը:
