Earlyone ստարտափը կներկայացնի Հայաստանը Seedstars World-ում
Մայքրոսոֆթ ինովացիոն կենտրոն-Հայաստանը Ձեռնարկությունների ինկուբատոր հիմնադրամի և Ինովացիոն լուծումների և տեխնոլոգիաների կենտրոնի հետ համատեղ հունիսի 25-ին Հայաստանի Ամերիկյան Համալսարանում կազմակերպեց Seedstars միջազգային մրցույթի Երևանյան փուլը։
Միջոցառման ընթացքում 50 հայտադիմումներից ընտրված 12 ստարտափերը ներկայացրեցին իրենց արտադրանքը միջազգային և տեղական մասնագետներից կազմված ժյուրիի անդամներին։ Ժյուրի անդամները ներկայացված պրոդուկտները գնահատեցին մի քանի չափանիշներով՝ թիմ, առկա վիճակը, կիրառելիությունը ավելի մեծ շուկայում, ստեղծած արժեքը և այլն։ Ժյուրիի քննարկումից հետո հայտարարվեցին հաղթող թիմերի անունները։ Հայաստանը Շվեցարիայում կայանալիք միջազգային մրցույթին կներկայացնի Earlyone թիմը, որի ստեղծած պրոդուկտը ուղղված է հաճախորդների սպասարկման բարելավմանը։ Ներկայումս այն արդեն սպասարկում է հազարավոր հաճախորդների Հայաստանի տարբեր ընկերություններում։
Միջազգային մրցույթում ստարտափը հնարավորություն կունենա իր պրոդուկտը ներկայացնել հնարավոր ներդրողների, գործընկերների դատին և մրցել 500,000 ԱՄՆ դոլար արժողությամբ մրցանակի համար։ Հայաստանյան փուլի երկրորդ և երրորդ տեղերը զբաղեցրեցին համապատասխանաբար Bazillion beings և Qlim ստարտափերը։
«Ստարտափերի էկոհամակարգը Հայաստանում մեծ զարգացում է ապրում, և տարեց տարի ավելի կայացած թիմեր են մասնակցում մրցույթին։ Մրցակցությունը մեծ է, և ընտրությունը կատարվում է՝ հաշվի առնելով բազմաթիվ չափանիշներ։ Մայքրոսոֆթ ինովացիոն կենտրոնը մշտապես աշխատում է թիմերի հետ՝ զինելով նրանց այնպիսի հմտություններով, որոնք անհրաժեշտ են հնարավոր ներդրողներին ներկայանալի դառնալու և շուկայում պահանջարկ ունեցող պրոդուկտ մշակելու համար։», – նշում է Մայքրոսոֆթ ինովացիոն կենտրոնի տնօրեն Արտաշես Վարդանյանը։
Մրցույթի տեղական հովանավորն են ԲեթԿոնստրակտ ընկերությունը և Շվեցարիայի դեսպանությունը Հայաստանում։ Մրցույթի կազմակերպմանն աջակցում են HIVE ընկերությունը, STARTITUP կենտրոնը, WICASTR ընկերությունը և Հայաստանի Ամերիկյան Համալսարանը։
