Նիկոլ Փաշինյանը և Զարուհի Փոստանջյանն ԱԺ արտահերթ նիստի մեկնարկին խոսեցին Հայաստանում եղած «քաղբանտարկյալների» մասին
Այսօր Ազգային ժողովում գումարված արտահերթ նիստի ժամանակ պատգամավոր Նիկոլ Փաշինյանը խոսքի իրավունք խնդրեց ու հայտարարեց, որ նախորդ շաբաթ ձերբակալվել է «Նոր Հայաստան» շարժման ղեկավար Ժիրայր Սէֆիլյանը, և «բոլոր հիմքերը կան մտածելու, որ սա քաղաքական հետապնդում է»:
«Սրա մասին է վկայում թեկուզ այն փաստը, որ դեռևս 1 տարի 3 ամիս առաջ Ժիրայր Սէֆիլյանի նկատմամբ հարուցված քրեական գործի նախաքննությունը դեռ չի ավարտվել, և հիմա երկրորդ քրեական գործն է հարուցվում: Ես դատապարտում եմ Հայաստանում շարունակվող քաղաքական հետապնդումները, կարծում եմ՝ Հայաստանի շահերից է բխում օր առաջ ազատվել քաղբանտարկյալ ունեցող երկրի պիտակից: Ես դատապարտում եմ Ժիրայր Սէֆիլյանի և մնացած բոլոր քաղբանտարկյալների՝ բանտում գտնվելը»,- հայտարարեց Ն. Փաշինյանը:
https://www.youtube.com/watch?v=oVbzrjV2YB4
«Ժառանգություն» խմբակցության պատգամավոր Զարուհի Փոստանջյանը նույնպես խոսեց Հայաստանում եղած «քաղբանտարկյալների» մասին՝ հայտարարելով՝ եթե Հայաստանում մարդկանց կալանավորում են այն հայտարարություններից հետո, որ իրենք պատրաստ են ազատագրել մեր հայրենիքը, նշանակում է՝ «կալանավորվում է Հայաստանի ազատագրումը»:
Անդրադառնալով այսօրվա նիստի օրակարգին՝ Զ. Փոստանջյանն ասաց. «Այն օրակարգը, որը ներկայացված է՝ Ընտրական օրենսգրքի մեջ փոփոխություններ անելու առաջարկը և ՀՕՊ համաձայնագրի անցկացումը, դրանք երկուսն էլ չեն բխում հայ ժողովրդի շահերից»:
https://www.youtube.com/watch?v=AtalgKxtZC8
