Գյումրիում Հռոմի պապի պատարագի 25 000 հայտագրվածների հրավիրատոմսերն արդեն բաժանվում են
Գյումրու Վարդանանց հրապարակում հունիսի 25-ին Ֆրանցիսկոս պապի ձեռամբ մատուցվելիք Սբ Պատարագի հրավիրատոմսերն արդեն տպագրված են և բաժանվում են մասնակիցներին: Այս մասին «Արմենպրես»-ին տեղեկացրին Հայաստանի, Ռուսաստանի, Վրաստանի և Արևելյան Եվրոպայի հայ կաթողիկե առաջնորդարանից: Գյումրիում հայտագրված մասնակիցները հրավիրատոմսերը վերցնելու են հայ կաթողիկե առաջնորդարանից՝ մինչև հունիսի 22-ը` ներառյալ, ժամը 10:00-16:30-ը և Երևանում՝ Քանաքեռի Սբ Գրիգոր Նարեկացի ժողովրդապետությունից, մյուս համայնքներում հրավիրատոմսերը կբաժանվեն ժողովրդապետերի միջոցով:
Յուրաքանչյուր հրավիրատոմսի վրա գրված է հայտագրված մասնակցի անուն, ազգանունը, ինչպես նաև՝ տոմսի թիվը, իսկ տոմսի հետևի մասում՝ քարտեզի վրա սլաքով ցույց է տրված այն փողոցը և վայրը, որտեղից մասնակիցը մուտք է գործելու Վարդանանց հրապարակ:
«Հրավիրատոմսերը անվճար են: Չպետք է հավատալ այն ստահոդ լուրերին« թե հրավիրատոմսերը վաճառվում են և կամ տրամադրվում տուրիստական գործակալությունների կողմից: Հրավիրատոմսերը կտրամադրվեն բոլոր հայտագրվածներին»,-»Արմենպրես»-ին ասացին առաջնորդարնից:
Տոմսերը բաժանվում են մոտ 25.000 հայտագրված մասնակիցների:
Արմենուհի Մխոյան
