ԱՄՆ Պետդեպի աշխատակիցներն Օբամային առաջարկել են գրոհել Ասադի զորքերի վրա
ԱՄՆ Պետդեպարտաﬔնտի աշխատակիցները նամակ են ուղարկել ԱՄՆ նախագահ Բարաք Օբամային, որտեղ նրան խորհուրդ են տվել ռազմական գործողություն սկսել Սիրիայի կառավարական ուժերի դեմ և պետական հեղաշրջում իրականացնել մերձավոր արևելյան այդ երկրում: Այդ մասին հայտնում է The Wall Street Journal թերթի էլեկտրոնային տարբերակը:
«Պետդեպի տասնյակ աշխատակիցներ այս շաբաթ բողոք էին հայտնել Սիրիայում ԱՄՆ քաղաքականության դեմ, նրանք ներքին փաստաթուղթ են ստորագրել, դրանում պարունակվում են կոչեր՝ նպատակաուղղված ռազմական հարվածներ հասցնել Դամասկոսի կառավարությանը և ասվում է, որ ռեժիմի փոփոխությունը ԴԱԻՇ-ին հաղթելու միակ եղանակն է»,- գրում է թերթը:
Նշվում է, որ կոնֆիդենցիալ ուղերձի պատճենը գտնվում է լրագրողների տրամադրության ներքո: Նմանատիպ պնդմամբ հանդես է եկել նաև The New York Times թերթը:
Այդ պարբերականների աղբյուրների տվյալով՝ փաստաթղթի տակ ստորագրել է ԱՄՆ արտաքին գերատեսչության 51 աշխատակից, ում գործունեությունը հիմնականում առնչվում է Սիրիային: Նրանց թվում կան նաև բարձր պաշտոններ զբաղեցնողներ:
Իրենց խորհուրդը նրանք հիմնավորում են նրանով, որ Բաշար Ասադը խախտում է կրակի դադարեցման պայմանավորվածությունը, որը գործում է Սիրիայի որոշ շրջաններում:
Ինչպես նշում է The New York Times-ը, «51 ստորագրությունը շատ է, եթե չասենք՝ աննախադեպ»: The Wall Street Journal-ը հիշեցնում է, որ «Օբամայի ադմինիստրացիայի ներկայացուցիչները մտավախություն են հայտնել, որ Ասադի ռեժիմի նկատմամբ հարձակումները կարող են հակամարտություն առաջացնել Ռուսաստանի և Իրանի հետ»:
Ինչպես գրում է The New York Times-ը, նամակում առաջարկվում է Սիրիայի կառավարական ուժերին հարվածներ հասցնել երկնքից, սակայն փաստաթղթի հեղինակները «խոստովանում են, որ ռազմական գործողությունները կարող են ռիսկեր պարունակել», մասնավորապես «կարող են Ռուսաստանի հետ խնդիրներ առաջացնել»:
ԱՄՆ Պետդեպարտամենտի մամուլի ծառայության պետ Ջոն Քիրբին հրաժարվել է մեկնաբանել գերատեսչության բարձրաստիճան պաշտոնյաների նամակի մասին հարցը, սակայն չի հերքել այն ուղարկելու մասին լուրը:
