ԵՄ-ն կարող է Ադրբեջանին մանդատ տալ նոր համաձայնագրի շուրջ բանակցություններ սկսելու համար
Ինչպես տեղեկացնում է Trend գործակալությունը, Ադրբեջանի փոխարտգործնախարար Մահմուդ Մամեդգուլիևը երեկ լրագրողների հետ հանդիպմանը չի բացառել, որ այս տարվա աշնանը ԵՄ-ը կարող է մանդատ տալ Ադրբեջանին՝ ռազմավարական գործընկերության մասին նոր համաձայնագրի շուրջ բանակցություններ սկսելու համար:
Նրա խոսքով՝ ներկա փուլում քննարկումները կողմերի միջև նոր համաձայնագրի վերաբերյալ շարունակվում են դրական հունով:
Մամեդգուլիևը նաև ասել է, որ հուլիսի սկզբին Ժնևում սպասվում է Ադրբեջանի և ԱՀԿ-ի ներկայացուցիչների հանդիպումը:
«Մենք արդեն պատասխանել ենք աշխատանքային խմբի բոլոր հարցերին: Կան դրական փոփոխություններ տնտեսական օրենսդրությունում, բոլոր փաստաթղթերն արդեն ներկայացվել են ԱՀԿ-ի գրասենյակ, և մենք ակնկալում ենք պատասխան: Եթե հանդիպումը, այնուամենայնիվ, տեղի ունենա, դրան կարող են միանալ նաև Ռուսաստանն ու Սաուդյան Արաբիան, որոնք արդեն հայտնել են նման ցանկություն»,- ասել է Ադրբեջանի փոխարտգործնախարարը:
Նրա խոսքով՝ ԵՄ-ի և Ադրբեջանի միջև հարաբերությունները շարունակվում են, նախանշվում են նոր հանդիպումներ ԵՄ կոմիտեների և ենթակոմիտեների մակարդակներով:
