ՄԱԿ-ի ԱԽ-ն Օռլանդոյի գիշերային ակումբի վրա հարձակումը գնահատել է որպես ահաբեկչություն
ՄԱԿ-ի Անվտանգության խորհուրդը դատապարտում է ԱՄՆ Ֆլորիդա նահանգի Օռլանդո քաղաքի Florida Pulse գիշերային ակումբի վրա զինված հարձակումը, որտեղ հավաքվում են ոչ ավանդական սեռական կողմնորոշում ունեցող մարդիկ և տեղի ունեցածը համարում ահաբեկչական գործողություն:
Այս մասին ասված է կազմակերպության պաշտոնական հայտարարության մեջ, որը տարածվել է երեկ:
«Անվտանգության խորհրդի անդամներն ամենայն լրջությամբ դատապարտեցին Օռլանդոյի ահաբեկչությունը»,- ասվում է փաստաթղթում:
Դրանում ընդգծվում է, որ «մարդկանց վրա հարձակումն իրականացվել է նրանց սեքսուալ կողմնորոշման պատճառով»:
ՄԱԿ-ի ԱԽ-ն նաեւ ցավակցություն է հայտնել զոհերի ընտանիքներին և ԱՄՆ-ի կառավարությանը, ինչպես նաև շուտափույթ ապաքինում ցանկացել վիրավորներին: Անվտանգության խորհրդի անդամներն ընդգծել են, որ ցանկացած ահաբեկչություն հանցավորություն է և չունի արդարացում՝ անկախ այն բանից, թե ինչն է դրա դրդապատճառը, երբ և ում կողմից է իրականացվել:
Կազմակերպությունը կոչ է արել բոլոր պետություններին «բոլոր ուժերով պայքարել ահաբեկչության դեմ՝ համաձայն միջազգային իրավունքի նորմերի»:
