Արման Թաթոյանը հանդիպել է ՀՀ-ում Գերմանիայի դեսպանին
Մարդու իրավունքների պաշտպան Արման Թաթոյանը հունիսի 13-ին աշխատանքային հանդիպում է ունեցել Հայաստանի Հանրապետությունում Գերմանիայի Դաշնային Հանրապետության արտակարգ եւ լիազոր դեսպան Մաթիաս Քիսլերի հետ: Այս մասին տեղեկացնում են Մարդու իրավունքների պաշտպանի աշխատակազմից: Հանդիպման ընթացքում քննարկվել են մարդու իրավունքների պաշտպանության երաշխիքների օրենսդրական եւ գործնական ամրապնդման, ինչպես նաեւ Մարդու իրավունքների պաշտպանի աշխատակազմի, մասնավորապես՝ մարզային ստորաբաժանումների կարողությունների զարգացման հարցեր:
Կողմերն իրենց պատրաստակամությունն են հայտնել մարդու իրավունքների պաշտպանությանն առնչվող եւ երկուստեք առաջնահերթություն ունեցող մի շարք ոլորտներում ամրապնդել եւ ընդլայնել փոխգործակցությունը: Կարեւորելով Մարդու իրավունքների պաշտպանի ինստիտուտի ու նրա աշխատակազմի ակտիվ գործունեությունը՝ դեսպան Քիսլերն իր պատրաստակամությունն է հայտնել քննարկել հարցեր երկկողմ համագործակցության շրջանակներում:
Պաշտպան Արման Թաթոյանը, արժեւորելով Հայաստանում մարդու իրավունքների պաշտպանության եւ ժողովրդավարական արժեքների ամրապնդման կարեւորությունը, հաստատել է Գերմանիայի Դաշնային Հանրապետության դեսպանության հետ մարդու իրավունքների պաշտպանության ոլորտում համատեղ ծրագրեր նախաձեռնելու եւ համագործակցության ոլորտներն ընդլայնելու իր պատրաստակամությունը:
