Ժիրայր Սէֆիլյանը չի բացառում համագործակցությունը Սամվել Բաբայանի հետ

«Նոր Հայաստան» հանրային փրկության ճակատի քաղաքական խորհրդի անդամ Ժիրայր Սէֆիլյանն այսօր լրագրողների հետ հանդիպման ընթացքում, խոսելով ԼՂՀ Պաշտպանության նախկին նախարար Սամվել Բաբայանի վերադարձի մասին, նշեց, որ պետք է պարզել՝ ո՞վ էր պարտադրողը, որ նա այսքան երկար տարիներ հեռու լինի հայրենիքից.

«Տարօրինակն այն է, որ Սամվել Բաբայանի նման մի անձնավորություն երկար տարիներ բացակայել է իր հայրենիքից: Որո՞նք էին այն երաշխիքները, որ Ռուսաստանում Սամվել Բաբայանին որևէ վտանգ չէր սպառնում՝ շատ լավ հասկանալով, թե Ադրբեջանն ինչպիսի հնարավորություններ ունի Ռուսաստանում: Վերջապես բոլորս գիտենք, որ այդ մարդը պետական բարձր պաշտոններ զբաղեցնելով՝ տիրապետում էր նաև պետական գաղտնիքների, ինչպե՞ս կարելի էր թույլ տալ, որ նա պարտադրված բացակայի Հայաստանից: Ի՞նչ խնդիր էլ որ լիներ, կարծում եմ, հնարավոր էր լուծում գտնել, որ այդ բացակայությունը չլիներ: Իմ կարծիքով՝ Սամվել Բաբայանը երբեք չպետք է բացակայի Հայաստանից. Հայաստան ասելով՝ նկատի ունեմ Արցախը»:

Նա ընդգծեց՝ բոլորդ նկատեցիք, թե ինչպիսի ջղաձգված վիճակ էր տիրում ստեփանակերտյան «իշխանիկների» մոտ. «Դժբախտաբար, ապրիլյան դեպքերը ևս դաս չեղան այդ մարդկանց: Հայկ Խանումյանի վրա հարձակվեցին և գիտենք, որ ստիպել են ստորագրել փաստաթուղթ, որտեղ նշված էր նաև, որ պետք է վերադառնա «իր Իջևանը»: Այդ վայրենիների կողմից նման արարքն ինձ համար զարմանալի չէ, սակայն վատն այն է, որ այդ միտքն այսօր ակտիվ շրջանառության մեջ է: Մենք լսեցինք նաև շարմազանովների և այլ չինովնիկների հայտարարությունները՝ քթերդ մի խոթեք ղարաբաղյան խնդիրների մեջ:

Ի՞նչ է սա նշանակում, հայ զինվորները պետք է զոհվեն արցախյան ֆրոնտում, բայց հայը իրավունք չունի՞ քիթը խոթելու արցախյան հարցերի մեջ, այս ինչ անհեթեթություն է: Այս երկվությունը շատ վտանգավոր եմ համարում ու կարծում եմ՝ մեր ժողովուրդը, բանակը ջլատելու հերթական տեղեկատվական-հոգեբանական հնարքն է: Բոլորին կոչ եմ անում այդ ծուղակը չընկնել և արհամարհել հիմարների կողմից րջանառության մեջ դրված այդ միտքը: Բոլորս պետք է հասկանանք՝ մենք մի ժողովուրդ ենք, չկա Արցախ-Երևան, կա Հայաստան և վերջ»:

Հարցին՝ հնարավոր է համարո՞ւմ է արդյուք Սամվել Բաբայանի հետ համագործակցությունը, նա պատասխանեց. «Այն կոմիտեն, որ փորձելու ենք ձևավորել(խոսքը «Ազգային դիմադրության կոմիտե»-ի մասին է:-Ռ.Մ.), վստահ եմ, որ Արցախից ևս բազմաթիվ մարդիկ իմ իմ բնութարումներին կհամապատասխանեն ու կներգրավվեն կոմիտեում: Այս կոմիտեն չի լինելու միայն երևանյան կոմիտե, մեր հայտարարության մեջ շեշտել ենք՝ արտերկրում բնակվող մեր հասարակությանը հայտնի մարդկանց պետք է դիմենք այդ կոմիտեում ներգրավելու համար, Արցախից՝ ևս: Սամվել Բաբայանը ևս կարող է լինել այդ կոմիտեում, բայց անուններ չեմ հայտարարում, երբ տեղի ունենան հանդիպումներ, ժողովրդին կիրազեկենք՝ ում հետ ենք հանդիպել և արդյունքն ինչպիսին էր»:

Մանրամասները՝ տեսանյութում