Թուրքիայում պատգամավորների նկատմամբ ավելի քան 100 դատական գործ է ուղարկվել դատախազություն
Թուրքիայի արդարադատության նախարարությունը պատգամավորների նկատմամբ հարուցված 117 դատական գործ է ուղարկել երկրի դատախազություն: Այս մասին հայտարարել է Թուրքիայի արդարադատության նախարար Բեքիր Բոզդաղը:
Հիշեցնենք, որ ավելի վաղ Թուրքիայի նախագահ Ռեջեփ Թայիփ Էրդողանը վավերացրել է օրենքը, որը թույլ է տալիս պատգամավորներին զրկել անձեռնմխելիությունից մինչ դատական հետապնդում իրականացնելը: Այն ուժի մեջ է մտել պաշտոնական Resmi Gazete-ում հրապարակվելուց հետո:
«Մենք 117 գործ ենք ուղարկել դատախազություն պատգամավորների գործով»,- հայտարարել է Բոզդաղը TRT-ին տված հարցազրույցում:
Հիշեցնենք, որ Թուրքիայի Մեջլիսը մայիսի 20-ին հավանության է արժանացրել Թուրքիայի իշխող «Արդարություն և զարգացում» կուսակցության օրինագիծը պատգամավորներին անձեռնմխելիությունից զրկելու վերաբերյալ:
Այն ժամանակավոր փոփոխություններ է կատարում Սահմանադրության մեջ, ինչը թույլ է տալիս մինչ պատգամավորների դեմ դատական հետաքննություն սկսելը զրկել նրանց պատգամավորական անձեռնմխելիությունից:
Ներկայում պատգամավորական անձեռնմխելիությունից զրկվելու վտանգը սպառնում է Թուրքիայի խորհրդարանի ավելի քան 150 անդամի:
