«Ադրբեջանի և Հայաստանի նախագահների հանդիպումը մեծ նշանակություն ունի մեզ համար». Փոլադ Բյուլբյուլօղլու
«Եթե Լեռնային Ղարավաղի հակամարտության սկզբնապատճառը չլուծվի, չկասեցվի Ադրբեջանի դեմ ագրեսիան ու Հայաստանի զորքերը դուրս չբերվեն մեր երկրի տարածքից, ապա ոչ ոք չի կարող ոչ մի երաշխիք տալ»: Այս մասին, ինչպես հայտնում է APA-ն, հայտարարել է Ռուսաստանում Ադրբեջանի դեսպան Փոլադ Բյուլբյուլօղլուն:
Ադրբեջանցի դեսպանի խոսքով՝ ադրբեջանցիները, Ադրբեջանի նախագահը երբեք չեն զիջի ոչ մի սանտիմետր: «Դա պետք է գիտակցեն բոլորը՝ և´ Հայաստանը, և´ միջազգային հանրությունը, և´ համանախագահները: Ադրբեջանի նախագահը, ԱԳՆ-ն բազմիցս հայտարարել են այդ մասին, սակայն մեզ չեն լսում, չեն ցանկանում լսել: Ապրիլյան իրադարձությունները ցույց տվեցին, որ ստատուս քվոն անընդունելի է»,- ասել է նա:
Անդրադառնալով Վիեննայի հանդիպմանը՝ դիվանագետը հիշեցրել է, որ այդ հանդիպմանը երկու երկրների նախագահները համաձայնել են հունիսին հերթական բանակցությունն անցկացնել:
«Եղել են տարբեր առաջարկներ հանդիպման վայրի մասին: Երեկ ՌԴ ԱԳՆ-ի կայքում տարածվել էր տեղեկություն այն մասին, որ եռակողմ հանդիպումն անցկացվելու է Սանկտ Պետերբուրգում, սակայն դա այնուհետ հեռացվել էր անհայտ պատճառներով: Ես լիազորված չեմ խոսել հանդիպման տեղի և վայրի մասին, սակայն կարծում եմ, որ այն հունիսին տեղի կունենա:
Այդ հանդիպումը մեծ նշանակություն ունի մեզ համար: Հանդիպմանը կորոշակիացվեն ապագա քայլերի վեկտորները՝ կապված Լեռնային Ղարաբաղի հակամարտության կարգավորման հետ»,- ասել է նա:
