ԵԱՀԿ Մինսկի խումբը հաստատել է հունիսի վերջին ԼՂ հարցով հանդիպումը
ԵԱՀԿ Մինսկի խմբի ամերիկացի համանախագահ Ջեյմս Ուորլիքը հաստատել է հունիսի վերջին Լեռնային Ղարաբաղի հակամարտության կարգավորման հարցով հանդիպման փաստը:
«Թեև մենք այս պահին տվյալներ չունենք հանդիպման մանրամասների մասին, սակայն կարող ենք հաստատել, որ հանդիպումը կայանալու է հունիսի վերջին»,-Trend գործակալությանն ասել է Ջեյմս Ուորլիքը:
Ամերիկացի համանախագահը հույս է հայտնել, որ կողմերը կշարունակեն քննարկել պայմանավորվածությունները, որոնք ձեռք են բերվել մայիսին Վիեննայում:
Հիշեցնենք, որ մայիսի 16-ին Վիեննայում ապրիլյան սրացումներից հետո առաջին անգամ հանդիպեցին Հայաստանի և Ադրբեջանի նախագահներ Սերժ Սարգսյանն ու Իլհամ Ալիևը:
Հանդիպումն ընթացել էր ԵԱՀԿ Մինսկի խմբի համանախագահող երկրների արտգործնախարարների մասնակցությամբ:
