«Եթե մեղավորներն իսկապես պատժվեն, ապա կհամարենք, որ Արցախում մեկ քայլով առաջ ենք գնացել դեպի ժողովրդավարություն»
ԱԺ պատգամավոր Թևան Պողոսյանն այսօր լրագրողների հետ հանդիպման ընթացքում նշեց, որ Արցախում տեղի ունեցած դեպքն ամբողջովին կհաղթահարվի, երբ ամբողջ քննությունը թափանցիկ ներկայացվի, դատաքննությունը թափանցիկ տեղի ունենա, և բոլոր մեղավորներն իրենց պատիժը կրեն. «Եթե մեղավորներն իսկապես պատժվեն, ապա կհամարենք, որ Արցախում մեկ քայլով առաջ ենք գնացել դեպի ժողովրդավարություն: Մամուլը պետք է պահանջատիրական լինի, որ տեղեկություններ տրամադրեն, թե ինչ գործողություններ են եղել, և իշխանությունները հասկանան, որ հետևում են, իրենց շնչին կանգնած են, ու իրավունք չունեն այս գործին մատների արանքով նայել»:
«Բարգավաճ Հայաստան» խմբակցության պատգամավոր Միքայել Մելքումյանն էլ նշեց, որ համամիտ է գործընկերոջ կարծիքի հետ. «Պետք է գնահատականներ տրվեն և իրավական գործողություններ կատարվեն: Դա Արցախի Հանրապետության ներքին գործն է, բայց մենք՝ որպես քաղաքական գործիչներ, չենք ասում՝ դա իրենց ներքին գործն է, և վերջ: Ցանկացած գործընթաց ԼՂՀ-ում, լինի դա ընդդիմության կամ իշխանության կողմից, որևէ կերպ չպետք է խաթարի արտաքին արտահայտման ձևը, որ մեր հակառակորդները չարձանագրեն, թե Արցախը ժողովրդավարական երկիր չէ: Մենք պետք է գիտակցենք նաև, որ ունենք կարևորագույն խնդիր՝ հաղթահարելու այն մշտական ռազմական վտանգը, որ կա»:
