ԵՄ առաջնահերթություններից մեկը ԼՂ հակամարտության կարգավորման հարցում Մինսկի խմբին աջակցությունն է. Ադրբեջանում ԵՄ ներկայացուցչության ղեկավար
Ադրբեջանում ԵՄ ներկայացուցչության ղեկավար Մալենա Մարդը հայտարարել է, որ Եվրամիությունն աջակցում է բոլոր հակամարտությունների խաղաղ կարգավորմանը: Նրա խոսքով՝ մարդկանց հակամարտությունների զոհ դարձնելը մեծ ողբերգություն է: Այս մասին, ինչպես հայտնում է APA գործակալությունը, հայտարարել է Ադրբեջանում ԵՄ ներկայացուցչության ղեկավար Մալենա Մարդը:
Հղում կատարելով ԵՄ դիվանագիտության ղեկավար Ֆեդերիկա Մոգերինիին՝ Մալենա Մարդն ասել է, որ Լեռնային Ղարաբաղում ներկայիս ստատուս-քվոն ձեռնտու չէ կողմերին:
«Մենք աջակցում ենք հակամարտության լուծման խաղաղ լուծմանը, ինչպես նաև ԵԱՀԿ Մինսկի խմբի ջանքերին: ԵՄ առաջնահերթություններից մեկը Լեռնային Ղարաբաղի հակամարտության կարգավորման հարցում Մինսկի խմբին աջակցությունն է»,- հավելել է Մարդը:
Նրա խոսքով՝ Եվրամիությունը իր դերն է խաղում ԼՂ հակամարտության կարգավորման լուծման հարցում: «Հարավային Կովկասում ԵՄ հատուկ ներկայացուցիչ Հերբերտ Զալբերն այց էր կատարել Ադրբեջան: Նա նաև մեկնելու է Հայաստան: ԵՄ-ն դարձյալ կօգտագործի իր բոլոր միջոցները խաղաղ ճանապարհով կարգավորելու Լեռնային Ղարաբաղի հակամարտությունը:
Տիկին Մոգերինիի մասնակցությամբ Եվրոպական խորհրդարանում քննարկվել է Լեռնային Ղարաբաղի հակամարտության հարցը: Դա ևս մեկ անգամ ցույց է տալիս, որ ԵՄ-ն աջակցում է Մինսկի խմբի ջանքերին՝ հակամարտությունը կարգավորել խաղաղ ուղով»,- ասել է նա՝ կարևորելով կրակի դադարեցման անհրաժեշտությունը:
«Մենք կձգտենք, որ Մինսկի խմբի համանախագահները քննարկման բերեն երկու կողմերին»,- ասել է նա:
