Շվեդ նախարարը հրաժարական է տվել Իսրայելը նացիստների հետ համեմատելու համար
Շվեդիայի բնակ-կոմունալ տնտեսության հարցերով նախարար Մեհմեդ Կապլանը հրաժարական է տվել իր հայտարարությունների պատճառով, թե Իսրայելը պաղեստինցիներին վերաբերվում է այնպես, ինչպես նացիստները՝ հրեաներին, հայտնում է BBC-ն:
Կապլանի հրաժարականի մասին այսօր հայտարարել է երկրի վարչապետ Ստեֆան Լյովենը:
«Ես ստացել եմ Մեհմեդ Կապլանից հրաժարականի հայտարարություն և հավանության եմ արժանացրել այն: Ես Մեհմեդ Կապլանին գիտեմ որպես մարդ, որը հավատարիմ է մարդասիրական և ժողովրդավարական արժեքներին, սակայն նախարարը պետք է ի վիճակի լինի ներկայացնել Շվեդիան այնպես, որ տարաձայնություններ չծագեն»,- հայտարարել է Շվեդիայի վարչապետը մամուլի ասուլիսի ժամանակ:
Իսրայելի մասին շվեդ նախարարի հայտարարություններն արվել էին դեռ 2009 թվականին, մինչ Կապլանի՝ 2014թ. նախարար նշանակվելը:
Նախարարի հրաժարականը արվել է Շվեդիայի կոալիցիոն կառավարությունում ծագած սկանդալների ֆոնին:
