Հովիկ Աբրահամյանը ցավակցական հեռագիր է հղել Գեղամ Գրիգորյանի մահվան կապակցությամբ
Այսօր կյանքից հեռացավ հայ մշակույթի ականավոր գործիչներից մեկը՝ Հայաստանի Հանրապետության ժողովրդական արտիստ, օպերային երգիչ, բեմադրիչ, Ա. Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար Գեղամ Գրիգորյանը: Նա համաշխարհային բեմերում հանդես եկած այն արտիստներից էր, որ բացառիկ ձայնի և տաղանդի շնորհիվ նվաճել էր միջազգային հանդիսատեսի սերն ու համակրանքը և մեր երկիրը լավագույնս ներկայացրել արվեստի այդ բարդ ու բարձր ոլորտում:
Հայաստանի Հանրապետության կառավարության և անձամբ իմ անունից խորին ցավակցություն եմ հայտնում Գեղամ Գրիգորյանի ընտանիքին, հարազատներին և մերձավորներին, ինչպես նաև մեր ժողովրդին՝ բեմական արվեստի իր լավագույն ներկայացուցիչներից մեկի կորստյան կապակցությամբ:
