22-ամյա երիտասարդն ուժ է գտել իր մեջ սովորելու այբուբենը
Հոկտեմբերի 14-ին Հայաստանի երիտասարդական հիմնադրամի (ՀԵՀ) Արարատի մարզային կենտրոնի նոր գրասենյակի բացման արարողության ժամանակ մարզի երիտասարդների հետ հանդիպման ընթացքում 22-ամյա Աշոտ Մանուկյանը, դիմելով ՀԵՀ հոգաբարձուների խորհրդի համակարգող Կարեն Ավագյանին, ասաց, որ ինքը գրել-կարդալ չգիտի և շատ կցանկանար տառաճանաչ դառնալ։ Կարեն Ավագյանը հանձնարարեց ՀԵՀ Արարատի մարզային կենտրոնի աշխատակիցներին կազմակերպել պարապմունքներ՝ երիտասարդին գրել-կարդալ սովորեցնելու համար։
Աշոտ Մանուկյանը Արարատի մարզի Մարմարաշեն գյուղից է։ Հենաշարժական խնդիրներ ունեցող երիտասարդը, ինչ-ինչ հանգամանքներից ելնելով, հնարավորություն չի ունեցել ուսում ստանալ։ Այսօր արդեն շաբաթական երեք անգամ ՀԵՀ մարզային կենտրոնում կազմակերպվում են դասեր՝ մաշտոցյան այբուբենն Աշոտին ուսուցանելու համար։ Աշոտը նշում է, որ սովորել երբեք ուշ չէ, և ինքը 22 տարեկանում ուժ է գտել իր մեջ տառերը սովորելու։
Հայաստանի երիտասարդական հիմնադրամի Արարատի կենտրոնն այս պարապմունքներից հետո երիտասարդի համար կկազմակերպի նրան հոգեհարազատ որևէ արհեստի դասընթացներ։
Հայաստանի երիտասարդական հիմնադրամի հասարակայնության հետ կապերի ծառայություն
