Սիրիացու մեկ անձնագիրն արժե 850-1000 դոլար, որի ներքո փախստականը կարող է հայտնվել Եվրոպայում և ստանալ բարենպաստ պայմաններում ապրելու հնարավորություն. արաբագետ
Արաբագետ Արմեն Պետրոսյանն այսօր հրավիրված ասուլիսում ասաց, որ Եվրոպայում սկսված միգրացիոն ճգնաժամի հիմքերը կապված են արաբական աշխարհում տեղի ունեցող ներքաղաքական գործընթացների հետ.
«Առհասարակ, միգրացիոն հոսքերը Եվրոպայի համար նոր երևույթ չեն: Անցած 5 տարիների ընթացքում փախստականների ընդունված չափաքանակը 110-120 հազար էր, որոնց հիմնական մասը Լիբիայի տարածքից ծովով անցնում էր Իտալիա, այնուհետև, համապատասխան քվոտաների համաձայն՝ բաշխվում էին Եվրամիության տարբեր երկրների միջև: Այս երևույթն առկա էր մինչև 2015թ. առաջին կեսը, իսկ 2015-ի ամռանից սկսած գործընթացները հանգեցրին Եվրոպան պատուհասած այս միգրացիոն ճգնաժամին: Ճգնաժամի պատճառը սիրիացի փախստականներն էին:
Միգրացիայի միջազգային կազմակերպության տվյալներով՝ այս տարվա 9 ամիսների ընթացքում Մերձավոր Արևելքից և Հյուսիսային Աֆրիկայից Եվրոպա է գաղթել շուրջ 486 հազար մարդ: Ընդ որում, այս կազմակերպությունը նշում է, որ 3 հազարն էլ չեն հասել Եվրոպայի տարածք և մահացել են ճանապարհին: ՄԱԿ-ի փախստականների հարցերով գլխավոր հանձնակատարի գրասենյակի տվյալներով՝ այդ թիվը մոտ 100 հազարով պակաս է»:
Արաբագետը նշեց, որ սիրիացիները Եվրոպա հասած փախստականների մոտ 40 %-ն են կազմում: Ըստ նրա՝ որպես սիրիացի փախստական՝ Եվրոպայում փորձում են հայտնվել մեծ թվով աֆղանցիներ, պակիստանցիներ, իրաքցիներ.
«Պատճառն այն է, որ սիրիացի փախստականների համար ավելի բարենպաստ պայմաններ են ստեղծված Եվրոպայում: Այս հանգամանքը պատճառ է դառնում բազմաթիվ հանցավոր երևույթների: Կան որոշակի ուժեր, կառույցներ, որոնք նպաստում են այս գործընթացի արագացմանը»:
Ա. Պետրոսյանը նկատեց՝ Թուրքիայի իշխանություններն անմիջական ներգրավվածություն ունեն այս գործում.
«Թուրքիայի հարևան երկրների հետ սահմանամերձ շրջաններից կամ Սիրիայի տարածքից փախստականներին հիմնականում տեղափոխում են թուրքական երկու նավահանգիստ՝ Բոդրում և Իզմիր, որտեղ գործում են հանցավոր խմբավորումներ, որոնք զբաղվում են փախստականների հավաքագրմամբ և դեպի Եվրոպա ուղարկելու տարբեր գործողություններով: Անգամ տարբեր թվեր են նշվում. 1500-5000 դոլար՝ նավի մեկ տեղի համար, բնականաբար, 1500 դոլարի դիմաց որևէ անվտանգության երաշխիք չի տրվում:
Իսկ սիրացու մեկ անձնագիրն արժե 850-1000 դոլար, որի ներքո փախստականը կարող է հայտնվել Եվրոպայում և ստանալ բարենպաստ պայմաններում ապրելու հնարավորություն: Օրինակ՝ վերջերս Սիրիայի տարածքում հավատարմագրված հոլանդացի մի լրագրող նման անձնագիր էր ձեռք բերել իրենց վարչապետի նկարով՝ սիրիացու անվան տակ, որ աշխարհին ցույց տա, թե ինչ հեշտ է ընդամենը 40 ժամվա ընթացքում ձեռք բերել անձնագիր և հայտնվել Եվրոպայի տարածքում»:
