Facebook-ը գերմանական սեգմենտում կհեռացնի փախստականների դեմ հնչող վիրավորական արտահայտությունները
Facebook-ի գերմանական ստորաբաժանման ղեկավարությունը մտադիր է Գերմանիայի արդարադատության նախարարության հետ համատեղ ամենակոշտ եղանակներով պայքարել սոցցանցերում քսենոֆոբիայի դրսևորումների ու օգտատերերի ռասիստական ելույթների դեմ:
Ինչպես նրանք հայտնել են, վերջին շրջանում սոցցանցի գերմանական սեգմենտում դիտվում է ռասիստական ու քսենոֆոբիական բնույթի գրառումների կտրուկ աճ, որը համընկել է Աֆրիկայից ու Մերձավոր արևելքից երկիր ներգաղթյալների մեծ հոսքի հետ:
Երկրի կառավարության ճնշման ներքո Facebook-ը խոստացել է խստացնել մոնիթորինգն ու ավելի օպերատիվորեն հեռացնել ներգաղթյալների հասցեին հնչող վիրավորական արտահայտությունները:
Այդ նպատակով մոտ ժամանակներս հավաքվելու է մասնագետների հատուկ խումբ, որը ուշադիր հետևելու է սոցցանցի գրառումներին, հայտնում է BBC-ն:
