Համակարծիք ենք Ուորլիքի հետ` Ղարաբաղի կարգավիճակի ու սահմանների հարցն առաջնային է. Դավիթ Բաբայան
«Ղարաբաղյան հակամարտության կարգավորումն ունի երկու հիմնական բաղադրիչ»,- այս մասին 168.am-ի հետ զրույցում հայտարարեց ԼՂ նախագահ Բակո Սահակյանի մամլո խոսնակ Դավիթ Բաբայանը՝ անդրադառնալով այսօր Երևանում ԵԱՀԿ ՄԽ ամերիկացի համանախագահ Ջեյմս Ուորլիքի դիտարկումներին: Ի դեպ, Ուորլիքը նշել է, որ առանց Լեռնային Ղարաբաղի կարգավիճակի հստակեցման՝ չի կարող լինել ղարաբաղյան հակամարտության համապարփակ լուծում:
«Ղարաբաղյան հակամարտության համապարփակ կարգավորում չի կարող լինել, եթե դրանում ներառված չլինի Լեռնային Ղարաբաղի կարգավիճակի հարցը: Համապարփակ կարգավորումը ներառում է նաև կարգավիճակի հարցը, և այդ նպատակով անհրաժեշտ է Լեռնային Ղարաբաղի ժողովրդի կամքի ազատ արտահայտում՝ որպես համապարփակ այդ կարգավորման մի մաս»,- ասել է Ուորլիքը` շարունակելով, որ համապարփակ կարգավորման տարրերից մեկը պետք է լինի Լեռնային Ղարաբաղի հարակից տարածքների վերադարձը:
Դավիթ Բաբայանն ասաց, որ միշտ ասել են ու շարունակում են պնդել, որ առանց Ստեփանակերտի մասնակցության՝ ղարաբաղյան հակամարտության բանակցային գործընթացի բոլոր փուլերին հակամարտության կարգավորում դժվար է պատկերացնել: Ըստ նրա` Արցախը չի կարող ստանձնել պարտավորություններ, որոնց մշակման աշխատանքներին չի մասնակցել, կամ իրականացնել որոշումներ, որոնք ընդունել են իր փոխարեն:
«Ուստի, մենք միշտ ասում ենք, որ պետք է մասնակցենք: Այլ հարց է` ինչ խնդիրների շուրջ պետք է մասնակցենք: Ես հասկանում եմ Ուորլիքի մոտեցումները, որ կարգավիճակն առաջնային խնդիրներից մեկն է: Մենք ևս ասում ենք` կարգավիճակ և սահմաններ: Ընդհանրապես ադրբեջանաղարաբաղյան հակամարտության կարգավորումն ունի երկու հիմնական հարց, մնացած բոլոր հարցերն ածանցյալ են այս երկու խնդրից: Հիմնական հարցերն են կարգավիճակն ու սահմանները: Կա հակամարտության կարգավորման կարճ և արագ ճանապարհ: Ադրբեջանը ճանաչում է Արցախի Հանրապետության անկախությունը, նստում ենք բանակցային սեղանի շուրջ՝ քննարկելու մյուս բոլոր հարցերը, լինի դա քաղաքակա՞ն, ռազմակա՞ն, մարդասիրակա՞ն, թե՞ այլ բնույթի: Առանց Արցախի՝ Արցախի ապագան չի կարող լուծվել»,- ընդգծեց Դավիթ Բաբայանը:
Վերջինս նաև հիշեցրեց, որ Արցախի Հանրապետության համար իր անկախությունն ու ազատությունը բացառիկ արժեքներ են, և այդ հարցում որևէ սակարկություն չի կարող լինել: «Արցախի ժողովուրդը երկու անգամ իր կամարտահայտությունը կատարել է համազգային հանրաքվեների միջոցով: Մեկը՝ 1991թ. դեկտեմբերի 10-ին, երբ կազմավորվել է, ստեղծվել Արցախի Հանրապետությունը, մյուսը` 2006թ. դեկտեմբերի տասին: Մեր կարգավիճակի վերաբերյալ մեր դիրքորոշումն արտահայտել ենք ազգովի շուրջ երկու անգամ: Սա էլ անհրաժեշտ փաստ է, որը պետք է հաշվի առնել»,- պնդեց ԼՂՀ նախագահի մամլո խոսնակ Դավիթ Բաբայանը:
