ՌԴ-ն Հայաստանի համար գազն էժանացրել է, բայց տարբերությունը թողնում են «Գազպրոմ Արմենիա»-ին
Այս տարվա հունվարի 1-ից Ռուսաստանը Հայաստանին գազը մատակարարում է 1000 խմ-ը 165 դոլարով: Այս մասին այսօր «Տնտեսական օրակարգ» համաժողովի ժամանակ հայտարարեց ՀՀ էներգետիկայի և բնական պաշարների նախարար Երվանդ Զախարյանը:
«Տարբերությունը գործող գնի համեմատ 25 դոլար է: Ամբողջ 25 դոլարը թողնում ենք «Գազպրոմ Արմենիա» ընկերությանը: Նպատակն է՝ փակել այն վնասները, որ ունեցել են դրամ-դոլար փոխարժեքի տատանման արդյունքում և որոշ ներդրումային ծրագրերի իրականացման համար: Բոլոր փաստաթղթերի ձևակերպումից հետո ՀԾԿՀ-ն ավելի մանրամասն կանդրադառնա հարցին»,- ասաց Ե.Զախարյանը:
168.am-ի հետ զրույցում նախարարը պարզաբանեց, որ այս գինը ՀՀ և ՌԴ նախագահների միջև ձեռք բերված պայմանավորվածության արդյունքն է, դա կապ չունի ԵՏՄ անդամ դառնալուց հետո մաքսատուրքերի զրոյացման հետ, քանի որ մաքսատուրքերը նախքան այդ էլ դուրս էին եկել:
