Ինչպե՞ս կրճատել հոսանքի ծախսը. քաղաքացիները լուծում են փնտրում
Մինչ Երևանում և Հայաստանի մարզերում բողոքի մեծ ակցիաներ են տեղի ունենում՝ ընդդեմ էլեկտրաէներգիայի սակագնի բարձրացման, մարդիկ այս ընթացքում միմյանց խորհուրդ են տալիս 1ԿՎտ հոսանքի դիմաց 6,93 դրամ ավելի վճարելու փոխարեն՝ օգտվել էներգախնայող լամպերից: Եվ պայքարում են էլեկտրաէներգիայի սակագնի բարձրացման դեմ՝ վստահ լինելով, որ կհասնեն դրական արդյունքների, և միաժամանակ՝ միմյանց հուշում են՝ օգտվել էկոնոմ լամպերից:
Մարդիկ արդեն սկսել են մտածել, թե ի՞նչ կարելի է անել, որ գոնե հոսանքի ծախսը կրճատվի, ու ըստ այդմ՝ քիչ վճարեն: Այսօր շուկան կարծես թե տալիս է այդ հնարավորությունը՝ առաջարկելով էկոնոմ լամպեր, որոնք, թերևս, կարող են լուծել գոնե բնակարանի լուսավորության համար քիչ հոսանք օգտագործելու խնդիրը:
Մենք շրջեցինք տարբեր տնտեսական խանութներով և փորձեցինք պարզել, թե էկոնոմ լամպերն ի՞նչ առավելություններ ու թերություններ ունեն, որքանո՞վ են կրճատում հոսանքի ծախսը, ի՞նչ արժեք ունեն, և այլն:
Խանութներում առաջարկվում են տարբեր ապրանքանիշերի էկոնոմ լամպեր, որոնց արժեքը սկսվում է 500-600 դրամից և հասնում մինչև 3-4 հազար դրամի: Էժան լամպերի որակից վաճառողները շատ դժգոհ են, ասում են, որ սովորական լամպերի նման կարճ կյանք ունեն: Իսկ սովորական լամպերի վատ որակի մասին բոլորս գիտենք, դրանք 1-1.5 ամսից ավելի չեն օգտագործվում, բայց գնային առումով ավելի մատչելի են (100-1000 դրամ):
Էկոնոմ լամպերն աշխատում են 1000-4000 ժամ: Էլեկտրաէներգիայի ծախսը կրճատում են մի քանի անգամ: Օրինակ, էկոնոմ լամպի 15Վտ-ը համապատասխանում է սովորական լամպի 60Վտ-ին, ինչն էլ կրճատում է հոսանքի ծախսը:
Վաճառողները խորհուրդ են տալիս հիմնականում չինական Torch էկոնոմ լամպերը, որոնք, ըստ նրանց՝ որակապես ավելի լավն են: Դրանց արժեքը սկսվում է մոտավորապես 600 դրամից՝ կախված նրանից, թե քանի Վտ է ու քանի ժամվա համար է նախատեսված: Օրինակ, 20Վտ (համապատասխանում է 100Վտ-ի) և, ասենք, մեկ տարի օգտագործվող լամպն արժե 800-900 դրամ:
Եթե հաշվի առնենք, որ մեկ տարի սովորական մեկ լամպն օգտագործելու համար վճարում ենք միջինը 1000-1500 դրամ, բայց դրանք, կարճ կյանք ունենալուց բացի՝ նաև խնայող չեն, ու հոսանքի ծախսն էլ է շատ լինում, ապա էկոնոմ լամպերը գնային առումով շատ հարմար են, քանի որ մեկ անգամ գնում ես և երկար օգտագործում: Վաճառողները փաստում են, որ անգամ հաճախակի հոսանքի տատանումների դեպքում էկոնոմ լամպերը 6 ամսից պակաս չեն օգտագործվում, իսկ սովորական լամպերը նման դեպքում օգտագործվում են 1-2 շաբաթ:
Էկոնոմ լամպերի առավելությունները շատ են, բայց դրանք ունեն նաև թերություն: Ըստ վաճառողների՝ էկոնոմ լամպերի միակ թերությունն այն է, որ դրանց լույսը ցավեցնում է աչքերը: «Սովորական լամպի լույսն ավելի մեղմ է, ու դրա լույսի տակ ավելի պարզ ես տեսնում, իսկ էկոնոմ լամպերի դեպքում աչքերն արագ են հոգնում, բայց եթե շատ երկար չես մնում այդ լույսի տակ, այլ օրվա մեջ մի քանի ժամ, ապա աչքերդ չեն հոգնի, չեն ցավի»,- ասում է վաճառողներից մեկը:
Ի դեպ, վերջերս լուրեր շրջանառվեցին, թե Հայաստանում հայ-կորեական համատեղ մի ընկերություն մտադիր է LED լուսատուների և լուսարձակների էկոնոմ լամպերի խոշոր արտադրություն նախաձեռնել: Խնդիրն այն է, որ հնարավոր է՝ այդ ընկերությունը լուրջ խնդիրներ ունենա հիմնականում Չինաստանից էժանագին սովորական լամպեր ներկրող խոշոր ընկերությունների հետ:
