Ռուսաստանի ու Ուկրաինայի միջև ապրանքաշրջանառության ծավալը նվազել է 43 տոկոսով
Ուկրաինական UNIAN լրատվական գործակալության փոխանցմամբ՝ 2014 թվականի արդյունքներով Ռուսաստանի ու Ուկրաինայի միջև ապրանքաշրջանառության ծավալը նվազել է 43 տոկոսով, ինչը բացատրվում է Մոսկվայի արտաքին կոշտ քաղաքականությամբ:
Այս մասին լրագրողների հետ ճեպազրույցի ժամանակ հայտարարել է Ուկրաինայի տնտեսական զարգացման ու առևտրի նախարար Այվարաս Աբրոմավիչուսը. «Նախորդ տարի Ռուսաստանի հետ առևտրային շրջանառությունը նվազել է 43 տոկոսով: Դա լուրջ անկում է:
Որևէ երկրի պարագայում չի գրանցվել նման լուրջ անկում: Դրա համար կան մի շարք պատճառներ. նրանց կողմից ագրեսիան, նրանց արտաքին կոշտ քաղաքականությունը և ոչ միայն Ուկրաինայի նկատմամբ, ինչպես նաև ռուսական տնտեսության ծավալի նվազեցումը որպես այդպիսին:
Մեկ բարել նավթի համար 60 դոլարի անկումը, ռուսական տնտեսության համար տարեկան նշանակում է 200 միլիարդ դոլար: Այսինքն, ռուսական տնտեսությունն այլևս այնպես մեծ չէ, ինչպես որ մինչ այդ էր»:
