Իլհամ Ալիևը մեկնել է Թուրքիա
Ադրբեջանական Turan լրատվական գործակալության փոխանցմամբ՝ Ադրբեջանի նախագահ Իլհամ Ալիևն աշխատանքային այցով այսօր մեկնել է Թուրքիա: Այս մասին նշված է Ադրբեջանի նախագահի պաշտոնական կայքում:
Ալիևն այցելելու է Կարս, ուր այսօր տեղի է ունենալու «Անդրանատոլիական» գազատարի (TANAP) կառուցման հիմնարկեքի արարողությունը: Գազատարը նախատեսված է ադրբեջանական գազը Թուրքիայի տարածքով Եվրոպա հասցնելու համար:
Սկզբնական շրջանում գազատարի տարեկան թողունակությունը կազմելու է 16 միլիարդ խորանարդ մետր, որից 6 միլիարդ խորանարդ մետրը նախատեսված է Թուրքիայի համար: Ակնկալվում է, որ խողովակաշարը շահագործման կհանձնվի 2018 թվականին: Նախագծի արժեքը գնահատվում է 11 միլիարդ դոլար:
