Հովիկ Աբրահամյանն այցելել է «Աստրա Կրիստալս» ձեռնարկություն
Վարչապետ Հովիկ Աբրահամյանն այցելել է սինթետիկ մոնոբյուրեղային շափյուղա (սապֆիր) արտադրող «Աստրա Կրիստալս» ժամանակակից բարձր տեխնոլոգիական ձեռնարկություն, որի արտադրանքը կիրառվում է էլեկտրոնիկայի, օպտոէլեկտրոնիկայի, ճշգրիտ ճարտարագիտության, ոսկերչության և այլ ոլորտներում:
Կառավարության ղեկավարը շրջայց է կատարել գործարանի արտադրամասերում և լաբորատորիայում, ծանոթացել սինթետիկ շափյուղայի աճեցման գործընթացին, արտադրական հնարավորություններին, առաջիկա ծրագրերին և ընդլայնման հեռանկարներին: Նշվել է, որ աշխարհում 10 երկիր է տիրապետում սինթետիկ սապֆիրի արտադրության տեխնոլոգիային, որոնց թվում է նաև Հայաստանը: Ընդգծվել է, որ նորարարական տեխնոլոգիաների կիրառմամբ սինթետիկ սապֆիրի արտադրության զարգացումը հեռանկարային կարող է լինել Հայաստանի համար, քանի որ աշխարհում գնալով ավելանում է սինթետիկ սապֆիրի օգտագործման ծավալը լուսադիոդների, սմարթֆոնների և սմարթ ժամացույցների էկրանների արտադրությունում:
Ընկերության ղեկավարությունը նշել է, որ ներդրումային ծրագրի շրջանակում նախատեսում է ավելացնել բյուրեղ աճեցնող սարքավորումների քանակը՝ ներկայիս 11-ից հասցնելով 40-ի, ստեղծել վերամշակման արտադրամաս և կազմակերպել սեփական հումքի արտադրություն:
