2014 թվականին Թուրքիայի բնակչության թիվն ավելացել է ավելի քան մեկ միլիոն մարդով

Թուրքական Son dakika կայքի փոխանցմամբ՝ 2014 թվականին Թուրքիայի բնակչության թիվը, 2013 թվականի հետ համեմատ, աճել է 1.028.040 մարդով՝ հասնելով 77.695.904 մարդու: Այս մասին են վկայել Թուրքիայի վիճակագրական վարչության (TÜİK) հրապարակած տվյալները:

Արական սեռի բնակչության թիվը կազմել է 38.984.302 մարդ՝ ողջ բնակչության 50.2 տոկոսը, իսկ իգական սեռի բնակչության թիվը՝ 38.711.602 մարդ՝ ողջ բնակչության 49.8 տոկոսը: Թուրքիայի բնակչության 18.5 տոկոսը բաժին է ընկել Ստամբուլին, ուր ապրում է 14.377.018 մարդ:

Անկարայի բնակչության թիվը հասել է 5.150.072 մարդ՝ ողջ բնակչության 6.6 տոկոսը, իսկ Իզմիրի բնակչությունը կազմում է 4.113.072 մարդ (ողջ բնակչության 5.3 տոկոսը): Ամենափոքր բնակչությամբ նահանգ է ճանաչվել Բայբուրթի նահանգը՝ 80.607 մարդ:

15-64 տարեկանների (աշխատանքային տարիք) թիվը, նախորդ տարվա համեմատ, աճել է 1.4 տոկոսով՝  հասնելով 52.640.512 մարդու (ողջ բնակչության 67.8 տոկոսը): 0-14 տարեկանների թիվը նվազել է մինչև 18.862.430 մարդու՝ ողջ բնակչության 24.3 տոկոսը, իսկ 65 և ավելի տարիք ունեցողների թիվն աճել է մինչև 6.192.962 մարդու՝ ողջ բնակչության 8 տոկոսը:

Հիշեցնենք, որ գրեթե մեկ տարի առաջ հաղորդվել էր, թե երիտասարդ բնակչության թվաքանակով (18.8 միլիոն մարդ) Թուրքիան Եվրոպայի առաջատարն է, և որ նա գերազանցել է 24 եվրոպական երկրի երիտասարդ բնակչությանը` միասին վերցրած: Բացի այդ, Թուրքիան իր երիտասարդ բնակչության թվաքանակով գերազանցել է եվրոպական 29 երկրից յուրաքանչյուրի ընդհանուր բնակչությանը:

Դեռևս 2011 թվականի ամռանը TÜİK-ը կանխատեսել էր, որ Թուրքիայի բնակչությունը չի կարող հասնել 100 միլիոն մարդու: Կանխատեսվում էր, որ 2020 թվականին Թուրքիայի բնակչության քանակը կհասնի 81.778.000-ի, իսկ 2025 թվականին՝ 85.407.000-ի: 2046 թվականին այն կհասնի իր գագաթնակետին՝ 92.276.000-ի։

Դրանից հետո Թուրքիայի բնակչության աճի տեմպը կանգ է առնելու և սկսելու է հետընթաց ապրել։ Արդյունքում, 2060 թվականին Թուրքիայի բնակչության թվաքանակը կկազմի 88.870.000 մարդ, ինչպես որ կլինի դրանից 30 տարի առաջ (88.266.000 մարդ)։