«Թուրքական հոսքը» կբարձրացնի Եվրոպայի էներգոանվտանգությունը. Լավրով
Ռուսական РИА Новости լրատվական գործակալության փոխանցմամբ՝ Ռուսաստանի արտգործնախարար Սերգեյ Լավրովը Մոսկվայում լրագրողների հետ զրույցում հայտարարել է, որ «Հարավային հոսք» գազատարի նախագծի շուրջ իրավիճակը չափազանց պարզ է:
Լավրովը մանրամասնել է, որ այդ նախագիծը փակվել է Եվրահանձնաժողովի խտրական վերաբերմունքի պատճառով: Լավրովն ընդգծել է, որ «Թուրքական հոսքի» նախագիծը հնարավորություն կտա բարձրացնել Եվրոպայի էներգետիկ անվտանգությունը՝ շրջանցելով տարանցման հարցում առկա խնդիրները:
Լավրովի խոսքերով՝ որպես «Հարավային հոսքի» այլընտրանք ներկայացված «Թուրքական հոսքի» նախագծի նկատմամբ արդեն իսկ հետաքրքրություն են ցուցաբերում Եվրոպայում.
«Այդ մասին ներկայումս ընթանում են կոնկրետ քննարկումներ: Հուսով եմ, որ այն կիրագործվի և հնարավորություն կտա բարձրացնել Եվրոպայի էներգոանվտանգությունը՝ նրան ապահովագրելով տարանցման խնդիրներից»:
Ռուսաստանը «Հարավային հոսք» գազատարի նախագծից հրաժարվելու մասին հայտարարեց նախորդ տարեվերջին, երբ Ռուսաստանի նախագահ Վլադիմիր Պուտինն այցելել էր Թուրքիա:
