Շիրակի թեմի Առաջնորդ Տ. Միքայել եպիսկոպոս Աջապահյան. «Այս մանկան կոչն է՝ ութերորդ զոհ չպետք է լինի, ութերորդ մարդուն վնաս չպետք է լինի»
Շիրակի թեմի Առաջնորդ Տ. Միքայել եպիսկոպոս Աջապահյանը փոքրիկ Սերյոժայի հոգեհանգստի արարողության ժամանակ իր խոսքում ասաց.
«Վիշտ և տրտմություն է ամենքիս սրտերում: Սգում ենք ամենքս այս դժվարին պահին: Միասնաբար պետք է դիմակայենք այս ողբերգությանը, որը ցնցեց ամենքիս»:
Խոսելով հասարակության ապրումների և վշտին դիմայակելու մասին՝ նա բոլորին հորդորեց այսօր և վաղը վիշտը տանել առանց ցնցումների, լուռ, աղոթքով:
«Հավաքվել ենք հրաժեշտ տալու այն մանկանը, որը այս 7 օրերին մեր բոլորի ուշադրության կենտրոնում էր: … Երկնքում ավելացավ ևս մեկ հրեշտակ: Աստված այնպես տնօրինեց, որ ինքը միանա իր ընտանիքին: Եվ այսօր ընտանիքը Ավետիսյան խաղաղ, երկրային օթևանների մեջ է»,- ասաց Շիրակի թեմի Առաջնորդ Տ. Միքայել եպիսկոպոս Աջապահյանը:
«Սակայն ցավ, վիշտ, կսկիծ կա մեր սրտերում: Ես կուզեի լինել պարզ մարդ, և կանգնած եկեղեցու անկյունում՝ աղիողորմ լացել, բայց դրա իրավունքը չունեմ, զրկված եմ այդ իրավունքից: Եվ իմ պարտականությունն ու պարտավորությունն է՝ ձեզ բոլորիդ մխիթարել»,- նկատեց նա:
«Հզոր ժողովուրդ ենք մենք և այդ հզոր ժողովրդի զավակներն ենք մենք, որ կարողացանք այս վիշտը տանել և տանում ենք տոկունությամբ, յամբերությամբ, խաղաղությամբ: Եվ այս մանուկը՝ յոթերորդ զոհը, այսօր երկնքից մեզ պատգամ է ուղարկում՝ ասելով՝ հանգիստ եղեք, խաղաղ եղեք, ապահով եղեք՝ մենք ապահովության մեջ ենք: Հետևաբար այսօր և վաղը մենք մեր վիշտը պետք է տանենք լուռ և աղոթքով՝ առանց ցնցումների, առանց ավելորդ արտահայտությունների: Որովհետև մանուկն ասում է մեզ այսօր՝ ութերորդ զոհ չպետք է լինի, ութերորդ մարդուն վնաս չպետք է լինի, քիթը չպետք է արյունոտվի՝ անկախ դավանանքից, ազգությունից»,- ասաց Սրբազանը՝ ավելացնելով, որ բոլորի՝ ուզողներին-չուզողներին պետք է ապացուցենք, որ մենք հզոր ժողովուրդ ենք:
