Ալեքսեյ Նավալնու կայքն ընդգրկվել է Ռուսաստանում արգելված բովանդակությամբ կայքերի ցուցակում
Lenta.ru-ի փոխանցմամբ՝ Ռուսաստանի կապի, տեղեկատվական տեխնոլոգիաների ու զանգվածային հաղորդակցությունների վերահսկողության դաշնային գործակալությունը (Роскомнадзор) արգելված բովանդակությամբ կայքերի գրանցամատյանում է ընդգրկել ընդդիմադիր գործիչ Ալեքսեյ Նավալնու կայքը (navalny.com):
«Սև ցուցակում» ընդգրկվել են ոչ թե Նավալնու կայքի առանձին էջերը, այլ՝ ողջ կայքը: Դրանից առաջ Նավալնին իր կայքում առաջարկել էր փողոցային բողոքի ակցիան հունվարի 15-ից տեղափոխել փետրվարի 2-ին. «Մենք սկսում ենք քաղաքական մեծ ակցիայի նախապատրաստությունը, որը բողոքի զանգվածային ակցիաների տեսքով կանցկացվի Մոսկվայում ու մի շարք խոշոր քաղաքներում»:
2014 թվականի մարտին Роскомнадзор-ը Գլխավոր դատախազության պահանջով իր «սև ցուցակում» ներառել էր Նավալնու բլոգը: Գերատեսչությունը վճռել էր, որ ընդդիմադիր գործչի կողմից բլոգ վարելը խախտում է տնային կալանքի տակ գտնվելու նրա պայմանները:
